روعـــه

اصدق لحظه في عمري

كنّا اثنيننا فيها

انا واهيا

شتا بارد

سما زرقه

طيور الحب تمليها

ابي تتخيلو المنظر

..

بحر صافي

وحبيبة عمري بحضني

وخدها يلمس اكتافي

امد ايدي انا للشمس

عشان تدفا .. وادفـيها

..

تحب ايدي

المها حيل

احضنها اغطيها

تغافلني

تبي تقرّب من شفاتي

تقرّب حيل

واخليها

اغمض عيني وافتحها

مثل ماهي

الاقيها

ارد اغمض عيوني

واقول يا عمري

عيديها

استحت

لميتها اكثر

وقلت يا رب تحميها

يا رب ارجوك تحميها

يا رب ارجوك تحميها




منــــــــاف نـــــــــذر

!!نــــــــادمه

نادمه

لنّي فقدتك .. نادمه

لنّي خسرتك .. نادمه

والدنيا عقبك عندي صارت مظلمه

اي نادمه

..

من غاب حسّك

مالي صوت

ملّيت من كثر السكوت

والله احس انّي بموت

من كثر مانا نادمه

اي نادمه

..

انا الوحيده اللي خسرت

يا ليتني جيت اعتذرت

مو منّي صدّقني انقهرت

وهذا انا جيتك نادمه

اي نادمه

!!واللي خلقني نادمه

!!واللي خلقني نادمه

منــــــاف نـــذر

!!شلونج

صدفه ما كان يتوقعها

متعود بعد ما يخلص من التمرين .. يمر الخدمه ياخذله عصير يبرد على قلبه

قلبه اللي احرقه الشوق والوله

ما توقع في يوم من الايام انهم بيلتقون

يااااااااااااااااه

ايام مرت من عمرهم

بنظره تذكرو احلى ايام حياتهم

حبهم

شوقهم

غلاهم لبعض

زعلهم

غيرتهم

..اجمعتها نظره

عمرها العين ما تجذّب

صدقوني

..

مثل ما اهي

ما تغيرت

حلوه

..

ما قدر يسلم عليها

..

كانت معاها بنتها

ابتسم لها

مسح على راسها

وسألها

شسمج؟؟

قالتله بخجل الاطفال

ريان

باس راسها

ومشى

!!كان يتمنى لو اسمها شوق

ادمعت عين الام

..

!!تدرون ليش

كان دايما يقول لها

عمري قبل لا تنامين

بس تحطين راسج على المخده وتتلحفين

تخيلي اني قاعد امسح على شعرج

وابوس راسج

وامشي

..

بقــول كلمــه

اشتر وبيع من العمر ما حلالك

خلني اضيع في هوا الحب والشوق

بقول كلمه

عمري ما قلتها لك

حبيت انا حبك

حبيتك بذوق

..

يا ذوق هالدنيا

يا عمري الباقي

روح ٍ بها احيا

وتحيا بها اشواقي

..

لو قلت ما احبك

القاك تهواني

وش احلى من قلبك

ليمن زعل جاني

..

يا كثر ما احبك

واكثر احب دنياك

اهرب من العالم

كلّه لجل القاك

منـــــاف نـــــذر

اقدر اشوفك

تمر علينا اوقات باليوم نحتاج فيها لاي شي يرفع من معنوياتنا

!!كلمه طيبه .. ابتسامه .. مزحه .. اغنيه لها ذكرى .. دعاء .. ايميل .. مسج

^^^^^^^^^^

عبدالله موظف في احدى البنوك

مجتهد .. عصري .. يحب عمله

يتحمل المسؤوليه واعباء الحياة

:)

في يوم من الايام هذي

وفي عز ماهو منهمك بالشغل

وتخيلوا

(اللووود)


وصل له هالمسج

:من نور


كثر ما الجو برّه اينّن

هم انت احلى منّه

..

ابتسم عبدالله و رد بنفس الوقت عليها بمسج


:يقول فيه

الجو ممكن يتغير بيوم من الايام

لكن انتي ما تتغيرين

:)

ديري بالج على نفسج

..

انتهى المسج

عقبها غمض عبدالله عينه

وتذكّر ملامحها

وابتسم

وكمل شغله

شكثر كان محتاج لهالمسج

كثر ما احنا كلنا محتاجين للاشياء هذي

البسيطه .. لكن لها قيمه ما تتقارن بالذهب

..

المهم في نفس اليوم

بالليل

كان عبدالله بسيارته

الانجليزيه

منزّل الجامات ومبطّل السن رووف

وقاعد يسمع اغنيه يديده لعبدالمجيد عبدالله

اسمها

يا عنود المها

وكل ما خلصت قام وعادها كثر ما يحب هالاغنيه

:)

رن الموبايل

والا هذي نور

قصّر على المسجل


و رد: الوو

نور : هااي شلونك

عبدالله : تماام

نور : وينك

عبدالله : بروح بيت اختي ازورهم شوي ولهت على عيالها

نور : اي .. انزين ما تقدر تمر جوني راكتس شوي

عبدالله :يستهبل .. ليش

نور : ابي اشوفك

عبدالله : انتي بالمرينا

نور : لا جوني اللي بالصالحيه .. تعال الجو حلو

عبدالله : منو معاج

نور : عذوب وندووي

عبدالله : اها .. سلمي عليهم

نور : الله يسلمك .. ماتيي

عبدالله : لا مو حاسب حسابي .. خليها مرّه ثانيه

نور : عادي شويّه

عبدالله : لا فشله واعدتهم ناطريني عالعشا .. اليايات انشالله

نور : اوكي براحتك .. سلم على شيّوم وبوسلي اياها

عبدالله : انشالله عمري .. يالله استانسي انتي .. اخليج مع رفيجاتج

نور : اوكي .. دير بالك على نفسك

عبدالله : انشالله .. وانتي بعد

نور : من عيوني

عبدالله : تسلم عيونج .. يالله باي

نور : باي

..

عبدالله تربطه بنور معزه كبيره وصداقه محّد يفهمها الا اهم

عمره ما رد لها طلب

عشان جذي

فاجأها بزيارة خاطفه للمطعم بدون ما تدري

يوم شافته ردت لها الروح

ابتسم بدون ما يبيّن للناس انهم يعرفون بعض

كان المكان متروس اوادم

وكانت مشاعرهم ماليه المكان اكثر من الناس كلهم

..

مشى عبدالله

وترك ابتسامه على ويه نور

تسوى الدنيا وما فيها

مـــود راحـــه

يالله انّك ترزقني في بيت حلو مثل هاللي بالصوره

وتجمعني فيه انا مع ام عبّادي وعبدالله ولين

اللهم آمين

قولوا آمين

:)

________________

نصيحه

روحوا فيلم

في محطة مصر

هذي الممثله انا احب تمثيلها

واحب شكلها بعد

:)

http://www.youtube.com/watch?v=_RL__JYbA4U

__________________

محتاج راحه

قاعد اعد لبرنامج اذاعي

بفكره يديده ومضمون يديد

وعلى محطه اذاعيه كويتيه يديده

راح اعلن عنّه من اتّم الموافقه عليه انشالله

وهم محتاج ارتاح شويّه بيني وبينكم

أيّام وراجع لكم

طابت أيامكم

يــــــــوم َ زِفـــــــافي

تحديث

القصيده كامله

:)

لعيونكم طبعا

اعلمُ كم اصبَحتي تخـَـافــي

من أن يأتي َ يوم َ زِفافــــي

فابكي مثل َ بُـكائي عليــــكِ

ف يومَ رحيلي هو الإنصافِ

سيأتي زمان ٌ تنوحــين َ فيــهِ

ستُلقين َ لومـا ً على الأعرافِ

كما كُنت دومــا ً أحِـن ُ إليــك

اتـاك ِ شعوري بيوم َ زِفافـــي

أتـــيتي تـَقـــولي أُريـدُك حـراً

عشيقي غَريمي حياتي مَنافـي

سأُهديك كونــا َ جَميلاً يُجـيــدُ

الذُبـولَ العُـذوبَة َوالإرتِجـــافِ

أتـيتي تقـولي سـأُهديـك لـــيلاً

سأُعطيكَ ( .... ) أليسَ بِكافـي

غريبٌ أتُهدينـي شيئـا ً لِغــيري

أتـُهدينـي ذنبــاً بِــهِ إقتِرافـــــي

أمـــا تــعـلمينَ بـِـأنــي زكــــيٌ

فبـينَ الـحـرامِ وبيـني اخـتـلافِ

عــزائي الـوحيدُ بأنـّـك جِـئــتـي

إلــيَّ حــزيـنَه بِيــومَ زِفـــافــــي

ولــكـنـي أعـلــمُ أنَّ الــــزمــــانَ

بِـذات الـجـروحِ سَيـأتي مـشـافي

وأعـلــمُ أنـّـي ســأُبقـــي بـقـلـبِـكِ

حُـبــا ًجمـيـلا ًطـُـوال َالـمـطـافِ ِ






منــــــاف نــــــــذر

ما نكلّم بعض

تحديث

لعيونكم

القصيده كامله

:)

مدّه عدّت واحنا ما نكلّم بعض

كان همــّي فيها انــّك تتّــعـظ

انـــا لمـــّا جيتك كانت نــيــتي

يـنـسى قلبك همّه لكـنّه رفـض

..

مــا حــلالك هــالبعاد إلاّ مـــعي

وانتا تدري كيف حبــــّك انفرض

لـــسّه عيني تنطر إنــّك ترجعي

لسّه قلبي لي طرى اسمك نبـض

..

يـــا طفل في داخلي لــو تسمعيـه

قــال احبّك صــوته اوّل ما لفــظ

بعده يتذكـــّر مـــكان ٍ كنــتي فيــه

ولو هو مــر طيفك تلاقـين انتـفض

..

يــالله قولــي مــا تبيــني وارفضــي

وشــوفي مــن فيــنا بوعده هو نقض

هــالـــكلام اللــي بـقـولــه احــفظيه

مـــا يفرقنـــا زعـلـنــا عـــن بــعض

مـــــنــاف نــــــذر

_________

بس لأنكم تستاهلون

ولأني اثق فيكم

نزّلت النص كامل

وبيني وبينكم

لأني وثّقته

:)

عليكم بالعافيه

الحين عطوني رايكم