صديقي يخونني !!

شلونكم يالاصدقاء

شدعوه مستعيلين تعرفون القصه

وناسه لما صديقي يخونني

:‏)‏

عموما انشالله راح اكتب القصه باقرب وقت

عندي اخبار وايد سعيده راح اقولها لكم انشالله بوقتها


حاليا ما عندي وقت اكتب وربي

صاير اقوى زبون بمكتبة جرير

لا يطوفكم

دشيت بسكة القراءه عاد الحين شيفكم

اذا عندكم اسامي كتب معينه لا تبخلون علي فيها

وانصحكم بكتاب

غير تفكيرك .. غير حياتك

..

واخيرا خلوني اتمنى لكم سنه كلها سعاده




وافراح ورزق وفير





بقى عندي شي ودي اعرفه




شنو احلى 3 صفات فيكم .. يعني في كل واحد منكم

؟؟





وكل عام وانتو بخير

GHENWA-OK

تم بحمدالله افتتاح محطتنا الاذاعيه

لمستخدمين النت

اتمنى انها تعجبكم

ولا تحرموني من ملاحظاتكم

للتنويه

البث لا زال تجريبي

راح اخبركم عن برامجنا في بوست لاحق

:)

والخير ياي بالطريج

الرابط

http://www.gokfm.com/

مناف نذر

شتا .. حب

شتا الكويت

موسم المحبه

الشباب الشياطين بهالفتره .. يحبذون البدينات

لحّد يزعل مني

هذا العرف

:)

..

بهذي الفتره كل شي يكون حلو

الهدوم .. الطلعات .. المطاعم والقعده برّه .. المخيمات .. الاغاني

السيارات الكشف .. الشاليهات .. الحداق .. وبلوقي بعد من الاشياء الحلوه بالشتا

..

اكثر المتزاعلين والمتباعدين يرجعون بهالفتره

مابي اقول ليش

بس يرجعون

اصلا الجو مو مال الواحد يكون بروحه

لازم يكون عنده حبيب

مؤقت على الاقل لي الصيف وبعدين كيفهم

مليييييييييييييق

..

شتا حب

انا ملاحظ شغله

مابي اتكلم عن الترينينغ سوتات الحلوه اللي هابين فيها

ولا بتكلم عن الناس اللي تلبسها سوا تركب عليها والا لأ

بس بتكلم عن شي محيرني

البنات ليش كله عكس التيار

اللي اعرفه انهم يبردون بسرعه

يعني بالصيف لي طولنا على السنترال بالدوام

قاموا يدورون لهم على شال يتدفون فيه

وحنّه واااي برد و واي برد

بالشتا الجو سحتني

ماشالله العموم لي فوق الركبه

يعني مو قصدي شي والله

بس خايف عليكم لا اكثر ولا اقل

:))

..

شنو الموضوع بالضبط

موضوعي اليوم عن الزعل

مو قلنا شتا والناس اللي تحب هذي حزتها

الجاذبيه مالها والي

اي ليش الزعل عيل

!!

هذي القصه اهداء حق صديقي عقيل

انا وعقيل كل خميس هابين هبّه

نتغدى بره عقب الدوام

خميس العزيمه علي

وخميس العزيمه عليه

اخر شي انفلّس

نتحدى منو عزيمته تكون اغلى من الثاني

اليمعه حلوه

والسوالف احلى

نقعد انا معاه ونفتح مواضيع

شي عن الدوام وشي عن الحياه وشوي سياسه ولو اني ما احبها

والباجي كله عن الحب

آآآبوك يالحب

:)

عقيل متابع جيد لمدونتي

يحب اللي اكتبه

وايد اوقات يقترح علي مواضيع يبيني اتطرق لها

منها الموضوع اللي الحين بتكلم فيه

..

الزعل

ليش نزعل .. ومتى نزعل .. وشكثر لازم نزعل ؟؟

نزعل لما نتضايق من شخص المفروض انه ما يضايقنا

متى نزعل .. اكيد بعد ما يصير الشي اللي يضايقنا

اما شكثر الوقت اللي نزعل فيه .. يعتمد على حسب تقديرنا

او حسب شعور المذنب بغلطته

..

بعض الزعل محبب

لكن لا يروح للمبالغه

كلنا نغلط

مافي انسان ما يغلط

لاي سبب كان

بقصد او بدون قصد

نغلط

لكن اكيد لما نحس بغلطنا لازم نتأسف

على اقل تقدير

في ناس تستعظم فكرة الأسف

ما تقبل على نفسها انها تقول هالكلمه

وفي ناس ما تقولها لكن تحسسك انها بجد ندمانه على اللي حصل

في احد منكم حس بلذّة المغفره

تدرون شكثر اكون راضي على نفسي لما اقول بقلبي اني مسامح اللي اذّاني

خصوصا لما يكون شخص احبّه

احط له الف مبرر

حتى ولو اني ادري انه غلطان

بس احبه

لازم اغفر له زلاته

يمكن باجر ايي علي الدور وانطر احد يغفر لي زلاتي

الدنيا دواره

انا شخصيا

حصلت لي مواقف بحياتي مالي ذنب فيها

موقف وصار

انا التزمت السكوت خوفا مني على مصلحة احد الاصدقاء

الناس فسرت صمتي بأني مذنب

ماحبيت اتكلم في ذاك الوقت حتى لا اخسر قيمتي

ولما يه اليوم اللي ابي اتكلم فيه وابرر

لقيت الناس ما تبي تسمعني

شنو اللي لازم اسويه بهالحاله ؟؟

ليش الناس تبالغ بالزعل

مهم انا نحط اعتبار للناس اللي نحبهم

نبادلهم الاحترام

ولو اخطأوا بحقنا او بحق نفسهم لازم نوقف معاهم

نعدلهم الطريج

هذي وظيفة المحبين سوا كانو اصدقاء والا اخوان او احباب والا اهل

نعطي للناس فرصه تعبر

هذي الفرصه راح تريحنا وتريحهم

بدال لا نشيل هم بقلوبنا ونتعامل معاهم بطريقه ما تعودوها منا ولا احنا تعودناها على انفسنا

..

تخيلوا معاي هالموقف

حبيب زعل على حبيبته

اهي حست بغلطتها

اتصلت عليه

محوّل المكالمات على البريد الصوتي

..

رساله رقم 1

الو

حبيبي والله اسفه

عفيه كلمني اذا سمعت الرساله

امواااه

احبك

..

رساله رقم 2

حبيبي ما يصير جذي

ابي اكلمك عفيه رد علي

اذا صج تحبني رد علي

ناطرتك

..

رساله رقم 3

(بصوت باكي)

وربي اسفه

لا تسوي فيني جذي

الله يخليك

والله احبك

..

في كل رساله من هالرسايل كان يسمعها حبيبها ويتقطع قلبه عليها

وده يرد عليها ويقول لها

اموت فيج

عمري لا تبجين عفيه .. عشاني لا تبجين

والله اني احبج

بس مابيج تغلطين

..

لكن في شي رده

ما رد عليها

مع انه يموت فيها

واهيا تموت فيه

لين صار الشق عوووود

والمسافه كل مالها تكبر

العناد والمكابر تسبب بفرقتهم

..

وتحسفوا مع الوقت على هاللحظه

اهي بداخلها تقول يا ريتني ما غلطت

واهو يقول يا ريتني رديت على مسجاتها

بس ما عاد يفيد الكلام

..

عقيل

في ناس انكتب علينا انه نمشي معاهم بنفس الطريج

ان سرعنا خطواتنا لقيناهم جدّامنا

وان بطأنا لقيناهم يمنا

الظاهر انه هذا الطريج طويل

وممنوع فيه الكلام

لكنه ممتع

:)

..

اهداء لك

لا تلومونه

إن صمتي لا يعني جهلي بما يدور حولي

ولكن ما يدور حولي

لا يستحق الكلام

..

احذر عدوّك مرّه

واحذر صديقك ألف مرّه

..

اهداء

صحيت من نومي

كلنا تيينا اوقات نكون غافيين بنومتنا

نتمنى انه اللي قاعدين نشوفه ما يكون حلم

..

ابي اتكلم عن النوم اجمالا

سبحات الله

شلون ايينا النوم

اللي اعرفه انه احيانا ننام عشان الجسم يكون تعبان

واحيان ننام عشان لازم ننام

!!

كأنه في شي يطفينه

مجرد ما نحط راسنا على المخده

ما يمدينا نحس الا تلاقونا دخلنا بعالم ثاني

..

تعالوا خلونا نسولف شوي

مابي اتكلم عن الاحلام

لكن في شغله حلوه ودي تجربونها معاي الحين

ابيكم تغمضون عيونكم

وتستحضرون صورة شخص تحبونه

تصدقون انكم راح تشوفونه

وبالهيئه اللي تحبونها

ممكن حتى انكم تتفاعلون مع هالصوره

رجاءا لحد يتخيّل اشياء عيبيه

:))

جربوها

وعطوني رايكم

..

احيانا نشوف احلام بحياتنا

نتمنى لو انها تكون حقيقه

واحيانا نتعرض لمواقف بحياتنا

نتمنى لو انها تكون حلم

..

.

.

.

.

.

سلّمت عليها

هذيك البنت الناعمه والبسيطه واللي مليان ويهّا طفوله

ردّت علي السلام

كنّا بمكان عام

طلبت منها اذا تسمحلي اقعد يمها

جاوبت

هلا

قلت

ممكن اقعد اهني

قالت

اي عادي

شالت جنطتها من الكرسي

وسوت لي مكان

كان بيدها كتاب

حاولت اني اقرا عنوان الكتاب

كان اسمه

لا تأمن لي .. أبدا

سألتها

يضايقج اذا دخنت

قالت لا عادي

كملت قراءه

وانا ولعت سيقارتي

رن تليفونها

جاوبت على الاتصال

كان صوت ريّال

قامت تكلمه بصوت خافت

اللي قدرت اسمعه من المكالمه

جملة

لا مو ناقصنا شي

اوكي

اوكي

الله يسلمك حبيبي

باي

,,

اهني انا منّعت شوي

قلت يا حسافه

طلع عندها واحد

بس ما يأست

اصلا وحده بنعومتها

مستحيل تمر حياتها بدون ما يكون عندها احد اهتم فيها

او حاول انه يتقرب لها

المشكله اني حيل انجذبت لها

قلت خل اغير الخطه

ابي ابين لها اني مجرد شخص اجتماعي

مو قصدي اني اتحرش او اي شي ثاني

يمكن لنا اهتمامات مشتركه

بديت اكلمها عن هواية القراءه

واخذنا وعطينا بالكلام

بصراحه كلامها كان وايد حلو .. مثلها

استمتعنا بالحوار

واخذنا الوقت بدون لا نحس بنفسنا

طالعت ساعتي

قلت اسوي نفسي ثقيل وامشي

صج ساعات نسوي تصرفات ونكون قاصدين النقيض

يعني نحاول نوصل شي للي جدامنا

لكن اللي بداخلنا شي ثاني

بصراحه

وضع البنات يحيّر

احس يبالغون بهالتصرفات

ما علينا

قلت لها

بس تأخر الوقت

صار لازم امشي

قالت لي فرصه سعيده

قلت لها

بتقعدين

قالت اي شويه وبمشي

عطيتها كرتي

قلت لها

اي شي تحتاجين لا يردج الا لسانج

يا حلو لسانها

:)

قصدي بالكلام

..

وراحت الايام

..

التقينا بعد فتره وكان معاها واحد ماشالله بليّه

شكله مهم

طالعتني وبسرعه وخرت عينها

انا قلت يمكن ما عرفتني

او نوعها من هذول البنات

بو تسليه وتضييع وقت وعقبها خلاص

لا تعرفني ولا اعرفك

بس بداخلي اقول مستحيل

انا عمرها نظرتي ما تخيب بالاوادم

خصوصا اني ذو بريق لا يقاوم في عيني

ّّ

كملت طريجي

كنت قاعد اطالع الاشياء من حولي

وفجأه

احس بأيد تلمس ظهري

التفت

والا اهي

قالت لي

هاي

شلونك

سوري ما قدرت اسلم عليك

معاي .....زو

قلت

لا عادي

وابتسمت بويها

قالت بسرعه ما اقدر اطول

لازم اروح بسرعه

قلت لها

اوكي ممكن سؤال

قالت

هلا

قلت بعده رقمي عندج

قالت لا والله مادري وين حطيته

ضاع

قلت لها

انزين سجليه بسرعه

قالت

سوري ما اقدر

باي

وراحت

..

قعدت عقبها كل يوم اغمض عيني

واشوفها بنفس الهيأه اللي يتني فيها

ترددت على كل الاماكن اللي التقينا فيها

بس بدون فايده

مرت الايام

..

رن تليفوني

رقم غريب

شلته

قلت

الو

قالت السلام

قلت

هلا والله

منو معاي

قالت اسفه الظاهر غلطانه

قلت حياج الله

باي

باي

..

مادري ليش خزنت الرقم

حطيت الاسم

!!

بعدها بيومين

مسج من نفس الرقم

مكتوب فيه

ما تعودت

اقطع احبابي

ولا فكرت اجافيهم

واذا اهما يعزوني

انا والله

امـــ

.

.

.

المسج ما ياني كامل

حسافه

بغيت ارد

بس ما عرفت شكتب

قلت خل اثقل شوي

..

مع الايام

كان ضايق خلقي

قاعد بروحي

ولاني ما احب الشعور بالوحده

قمت ودزيت مسج لها

وكأني غلطان

ما ردت علي

استمرينا على هالحال

مسجاتنا كانت معطيه اكشن للعلاقه

شوي شوي

تجرأت وقالت لي

انا اعرفك عدل

قلت لها ممكن تكلميني شوي

عيّت اول شي

بعدين مع الوقت

لما تطمنت لي

صار الاتصال

طلعت اهي

..

قضينا مع بعض احلى ايام حياتنا

كنا متفاهمين لابعد حد

الحياه معاها كانت حلوه

اهتمامي فيها كان اكثر شي تحبه فيني

ابتسامتها كانت تحسسني ان الكون ملكي

..

كلمتها عن حياتي كلها

تطمنت لها وايد

علمتها عن كل الاشياء اللي احبها

فهمتها انها اذا حبت تبين لي عن احتياجها لي

كل اللي عليها تسويه

بس تضم ايدي

واذا حبت تبين لي عن قيمتي عندها

تقرب شفاتها من جبيني وتبوسني

واذا حبت تبين لي انها خايفه من شي

لازم توقف ورى ظهري

وتلمني حيل

واذا زعلت مني

بس خل تطالعني بعيونها

بدون لا ترمش

واذا ضايقتها بدون لا احس

كل اللي عليها تسويه انها تقرصني على زندي

واذا يه يوم وافترقنا

.

.

.

.

.

لا تعلم الناس بعيوبي

..

صحيت من نومي

لقيت الناس كلها تعرف قصتنا

..

دفعت 18 دينار صدقه

..

اهداء

تتزوجيني

لحظات جميله تمر على الانسان بحياته يفضل يفتكرها بين فتره وفتره

اسمع قصص مختلفه عن طريقة زواجات تمت بين اثنين كانوا على علاقه غراميه

خصوصا اذا كان حبهم منبني على اساس

منهم كان الاعجاب سبب للارتباط

ومنهم نزاغة الولد كانت السبب

ومنهم جمال البنت كان السبب

..

الاجانب عموما يفرقون عنا بطريقة الارتباط

خصوصا اذا كان الامر يتعلق بالزواج

عندهم طريقه تميزهم عنّا

يمكن لانهم عادتا يتزوجون بالوقت المناسب

بالوقت اللي يكونون ناضجين فيه

وعارفين وراسمين مستقبلهم ومخططين لكل شي يبونه

حتى التفاصيل الصغيره

..

هذا ما يمنع انه احنا بعد لنا طرقنا

صح ساعات تكون هذي الطرق شيطانيه

:)

بس ما يمنع دام النهايه بتكون سعيده

..

ساعات يصير عندي اهتمام بالناس اللي حولي

اشوف صبي ماسك الموبايل ويتكلم وهو سايح

اقول يحليله

او بنيه يمي بالاشاره الصبح واحنا رايحين الدوام وطايحتله تكركر

اقول شدعوه من الصبح قاعد يضحكج

الله يهنيكم

ويجعل ايامكم كلها فرح ووناسه

..

قبل لما كنت بالمتوسطه

كنت كله اقول يارب

راح ايي اليوم اللي ادش فيه الثانويه

خلصت المتوسطه .. صار الغزو

HE HE

عقب التحرير دخلت الثانويه

وهم كان الهاجس اهو

يارب راح اعيش لما اطلع اجازه واسوق سياره

صار عمري 17 وابوي فاجأني بالرانجلر

كان حلم حياتي

من كثر ما كنت احب هالسياره كنت اصفط عند بيتنا

واصعد فوق اطل عليه من الدريشه

يحليلي مو مصدق

وتالي ياني هم ثاني

يارب راح اتخرج من الثانويه

وتخرجنا من الثانويه

وعقبها طبعا الجامعه

والشغل

والزواج

كنت دايما اسأل نفسي

يا رب شلون راح يكون شكل زوجتي

ووينها اهي الحين

هل قريبه مني او بعيده

لما ياني النداء

اذكر اني كنت شارط على اهلي

واللي يعافيكم اذا بتدورولي مره

ابي وحده بيتهم بمشرف - بيان - العاصمه

لا تودوني قلعة وادرين

الاحمدي مادري وين مابي

:)

طرار واتشرط

كنت وقتها بالحج

اتصلت علي اختي وقالت لي

مناف لقيت لك مره

قلت لها هذي اكيد حوبة الشيطان ليش اليوم لعنت والديه تحذّف بالصخر

:)

المهم كنت متحمس اني ارجع الكويت انا وقرعتي عشان اتزوج

والحمدلله

لقيت اطيب انسانه عرفتها بحياتي

اللي اهي ام عبّادي

..

لحظه

ليش انا جم انسانه عرفت بحياتي عشان تصير ام عبيد اطيبهم

مادري

:)

المهم لا تدققون وايد

..

تذكرون القز قبل على ايامي انا واللي من طقتي

على ايامي كانو ما يدخلون الشباب ولا مكان

لا مجمع زهره ولا ليلى جالري ولا مركز سلطان حتى

اذكر كنا كله معلقين بماكدونالدز البحر

والجخ كانو يروحون الصالحيه لين الساعه 8 وعقبها كل القروبات

يتعشون بتشي تشي اللي على البحر

مطعم مركز سلطان اللي صوب مركز المعلومات - ملوت الخيران

ويوم الجمعه الغدا لازم بمطعم فدريكرز

المطعم يكون ترسه قرعان من طلبة الضباط اللي يخلصون من المطعم

وطوّالي على الحلاق ينعمون الصلعه استعدادا لدخول الكليه قبل الساعه 8

..

بروح معاكم لي منتزه الضباعيه

تذكرونه

يوم الاربعا بالليل

شلة الفراريات وغيرهم

دشداشه بو غوله وكاب

واحد التقى فبنت كانت ايه من الجمال

نص شباب الشاليهات لاحقينها

واهي ما فز قلبها الا لهالولد

نظرات الاعجاب كانت متبادله من الطرفين

الحياه كانت بس خز

خلص اليوم

الولد حدر الديره

وكل اللي قدر يسويه اني يحفظ صورتها بعقله

وتم باله مشفول معاها

كل امله انه يلقاها الاربعا الياي

وطاف عليه الاسبوع ابطء من النمله

وصار الاربعا الموعود

راح ونفس ردة الفعل

بس نظرات من بعيد لي بعيد

المسكين تبريد مو عارف يتكلم

ما طلع علي

والا جان خالص موضوعها من زمان

:)

..

استمر هالموضوع لي مدة شهر ونص تقريبا

يعني ست اسابيع

لين صار وقت الامتحانات وانقطعت البنيه عن المكان

انفقد الامل عند الولد

قام يسأل ويتقصى اهي من بنته

يسأل رفيجه عشان يسأل رفيجته عنها

وين تدرس

بأي ثانويه

لكن كل الاماني تبخرت

عقب سنه تقريبا

شاف صورتها بالجريده مع الخريجات

عرف اسمها

ومن اي ثانويه تخرجت

استانس واااااااااااااايد

يمكن فرحته بتخرجها كان اكثر من ابوها

كان وقتها بالجامعه

قال يا رب تدخل الكليه اللي اهو يدرس فيها

سبحان الله

الله عطاه على قد نيته

التقى فيها بأول اسبوع دراسه

اهي كانت مستجده

واهو باقيه له سنه ويتخرج

اهي انصدمت يوم شافته

ابتسمت بويها

اللـــــــــــــــــــــــــــــــــــــــــــــه

شصار فيه

طار من الوناسه

اهني عاد بدى يفتهم

قام يثبّت محاظراتها

ويوم عقب يوم

قام يصفط يم سيارتها يوميا

عيونه ما غابت عنها ولا لحظه

يخاف عليها اكثر من روحه

يهتم فيها ويحاول كثر ما يقدر انه يوخر عنها كل اذى ممكن ينالها

من اي مخلوق بالكون سوى داخل الجامعه او بره

يحبها .. تفهمون شنو يعني يحبها

..

اول مره كلمها بحياتها كان عتبان عليها ليش حاطه باجة قائمه منافسه لقائمته

ردت عليه انها مقتنعه بافكارهم

ليش ما تبيني اعلق الباجه

قالها لأ براحتج

اهي كانت مالها شغل بالقوائم

بس عشان رفيجاتها

وعشان تسوي اكشن بعلاقتها معاه

بس ثاني يوم حطت باجة القائمه اللي اهو يشتغل معاهم

شافها جان يبتسم

قال لها

اي هذي احلى عليج

يا حلاتهم

حبو بعض

تعلقو فبعض

الكل كان ملاحظ قربهم من بعض

رفيجاتها وربعه

اهتمامهم فبعض كان واضح

طبعا عيال الحرام ما تركوهم بحالهم

لازم محاولات الخبث

لكن حبهم كان منبني على اساس

محد قدر يأثر عليهم او يخرب هذي العلاقه الحلوه

..

الولد تخرج من الجامعه

واشتغل

واهي للحين بنفس الكليه تدرس .. بس هم ما بقالها شي على التخرج

ما فرق شي بعلاقتهم الا انهم ماقامو يشوفون بعض يوميا نفس قبل

..

خطاطيب البنيه زادوا

كل شهر اتصالين لوالدتها

ناس شايفينها

ناس دالينهم عليها

ناس متكلمين عنها

هذا غير واحد من عايلتها مادري من وين طلع وهم يبيها

اهي كله تتحجج مابي

ابي اكمل دراستي

امها شكت فيها

قالت لايكون عندج احد فبالج وتحبينه

سمعيني

ترى احنا ما عندنا هالخرابيط

ترى والله ان ابوج سمع كلمه عنج مو زينه لا يذبحج .. فاهمه

مع تكرار السيناريو

وصلت لي طريج مسدود

تقدم لها واحد من عايله زينه وولد يشتغل بمكان زين

الام تحمست له

واجبرت البنت انها تقابله

وتقعد معاه لي يو يخطبونها

واتفقت مع ام الولد على الموعد

البنت اكتأبت

شافت ماكو فايده

ماراح تقدر تقاوم بروحها

شتسوي

رفيجتها نصحتها انه تقعد مع اللي خاطبها

وتبالغ بالطلبات او تسوي اي شي عشان تبعده عنها

تبين له انها مو منجذبتله

يو اهل المعرس

قعدو بالصاله

واهي متعلقه فوق بدارها

ما تبي تنزل

ما تدري شتسوي

ضميرها قام يأنبها

دزت مسج لحبيبها

اكتبت له

أحبك

..

صعدت امها لها

قالت لها يالله شناطره نزلي

الجماعه تحت والمعرس مع اخوج بالدوانيه

البنت حاشها عوار بطن

بقلبها تقول مابي الا حبيبي

ليش يا رب

انزلت الصاله

سلمت

شافت ام المعرس

تبسمت

اعرفها

هذي ام حبيبي

وهذول خواته

وحده منهم تعرفني

طالعتني جان تغمز لي

اااااااااااااااااااه

ياهي فرحه

صار الوقت اللي بيدخلون المعرس عشان يقعد معاها

ويتعرفون على بعض

دخل المعرس

والا اهو

طالعها بنفس النظره اللي عودها عليها

قلوبهم كانت تدق بنفس السرعه

اول جمله قالها لها

..

بالنسبه للمسج اللي دزيتيه توّج

ترى

حتى انا

اموت فيج

عمري

تتزوجيني

جاوبت

يا مينون

احبك

..

اهداء