تحديث اجباري
17.09.2007
HAMDOOL
كل عام وانت بخير
وعسى عمرك كثر كومنتات زوّارك
:)
مبارك عليكم الشهر
وعساه يكون شهر خير ورحمه وبركه عليكم كلكم
يا الغالين
عندنا فرصه ثمينه نتصالح فيها مع انفسنا
ومع كل من كان على خلاف معانا
ونبدأها بأهالينا والقراب منّا
عشان تتصافى النفوس
ونعيش حياة نكون راضين فيها عن نفسنا
ويكون ربنا راضي عنّا
_________________________________
هالعاده بأذن الله راح اقطعها
وبرجع حق رياضتي
بس صار فيني لازم ارد جسمي
مثل ما كان واحسن
اذا شفتو واحد طول رمضان بس يمشي بالكويت
لا تقولون عنه مينون
ترى هذا انا
:)
_____________________________
هذي الصوره في مطعم نينو مع خالد البريكي والمخرج أحمد دشتي
واللي مصورنا واحد من الويتريّه
حدّه يشابه عادل رويشد
:)
معلومه فنيه عني
يمكن البعض قرا في بعض الصحف
انه مقدمة مسلسل
بلاغ للرأي العام
واللي اهو من بطولة
منصور المنصور
محمد المنصور
حسين المنصور
خالد البريكي
خالد امين
فيصل الرشيد
عبدالله الزيد
من كلماتي وألحان نواف البناي
هذا الكلام صحيح
لكن تم سحب الاغنيه
بعد ما ان قمنا بتنفيذها بالقاهره
لأسباب خاصه
لذا اقتضى التنويه
والاغنيه الحاليه
ليست من كلماتي
___________________________
بكل اسى اترحم على ارواح هالشباب
حمود صلاح البرجس 17 سنه
يوسف طلال النفيسي 17 سنه
عبدالله فواز الفضل 17 سنه
اللي راحوا قبل لا يدخل علينا الشهر الفضيل
ولأنهم اصدقاء اخوي الصغير عارف
ماقول غير الله يصبّر قلوب اهاليهم
ويلهمهم السلوان
وعساها آخر الاحزان
اللهم انك قريبٌ سميعٌ مجيب
لا حول ولا قوة الا بالله
___________________________
نصيحه يالغاليين
هالساعه اللي بتجابلون فيها النت
استغلوها بقراءة كتاب الله
افيد
ونصيحه لأخواتي البنات
اهتمو بثيابكم
وبحشمتكم في هالشهر
عشان لا تجرحون صيامكم
وصيام من حولكم
ونصيحه لاخواني الشباب
العقل والثقل تراهم اقوم وافيد
يا مصلين التراويح
ويا من تنطرون العشر الاواخر
بلهفه وشوق
لا تنسونا بالدعاء
..
هنيالكم
وتقبل الله صيامكم وقيامكم يا رب
وعدنا بعد رمضان ان الله احيانا
تطيب لكم ارواحكم
وتطيب روحي يا رب
مناف نذر
هذي الصوره كانت في غبقة المسرح الكويتي
