مبارك عليكم الشهر

تحديث

هذه الصوره بعد المؤتمر الصحفي

مبارك عليكم الشهر

اقولها لكل من يمر على هالمدونه

ولما اقول الكل

اقصد الكل

حتى اللي ما يحبوني

:)

اقولها لهم من قلبي

انشالله يكون هالشهر شهر خير

لهم ولي

..

اليوم عندي مؤتمر صحفي بفندق المرينا

الساعه 7

عن برنامجي في رمضان

يوميات بوهيلان

على المرينا أف أم

تابعوني

ولا تحرموني من ملاحظاتكم وتعليقاتكم

..

ولكم الشكر

مناف نذر

مرتاحه .. حياتي

تستغرب الناس مني

دايما يسألوني

صج مناف انت جذي

يعني بجد فيك هالكم من الحب

احيانا نحس انك الشخص اللي ندور عليه

لما تكتب شي عن الحب

نلاقيك تلمس مشاعرنا

نتمنى لو ان اللي نحبهم يفكرون نفس تفكيرك

او حتى نكتفي لو يقرون اللي تكتبه

شلون مناف ؟؟

شلون نقدر نكون مثلك

انت شلون تحب .. مناف

..

تبون تعرفون شلون أحب ؟؟

سألوا حبيبتي

سألوها شكثر احبها

سألوها ان كانت مرتاحه معاي

سألوها ان كان حبي يكفيها والا تبي اكثر

شوفوا ايدها ان كان عطري بعده مطبوع فيها

شوفوا شعرها اذا كان بعده مبعثر من اصابعي

شوفوا قميصها اذا كان بعده متعفّس من لمّتي

شوفوا شفاتها ان كانت للحين ترتعش

بعدها بتعرفون

..

اهداء

before .&. after

before

..

after

اهداء

miss you ..

للحين غاليه بقلبي

فجأه بدون مقدمات

لاحظت ان احنا لما نسافر

اول ما يطري فبالنا

ناس تركناهم وسافرنا عنهم

نلقاهم بكل ركن برحلتنا

نشوفهم معانا بكل لحظه

نتحسر على الاماكن الفاضيه اللي يمنا

نتمنى لو يملونها بوجودهم

نرجع لصناديق حفظ الرسايل

نقرا مسجاتهم القديمه

بعدها تحمل نفس القيمه

غاليه علينا

ما مسحناها

لانها تزيد قلوبنا بهجه

ولأنها تذكرنا بملامحهم

ملامحهم اللي نحبها

..

اهداء

لقيت بفنجاني

السلام على الجميع

يقولون الربع يتغيرون بعد الزواج .. مو ملاحظين هالشي

وين قبل اليمعات والطلعات والقز والشاليهات

ويعللون انه صار عندنا مسئوليات وبيت تدرون!! يعني صج

واخر شي تلاقونهم مايدرون عن بيتهم شي

..

بعض الاصدقاء محافظين على يمعاتهم

يلتقوون بدوواوين والا بقهاوي وخلافه

والصديقات بعد بعضهم عندهم يمعات بنات

والا اعياد ميلاد وهيك شي

..

في ناس تحب اللمّه .. انا واحد منهم

اللمّه يعني اليمعه مو الحضنه

مع انه اثنيناتهم حلوين بالمعنى والمضمون

نقص حنان

شنسوي

:)

المهم نرجع للموضوع .. هذول الناس وارد عندهم انهم ينسقون لسفره عائليه مثلا

كل واحد وزوجته .. او طلعة بر .. والا شاليه .. او حتى يمعات وزوارات بينهم وبين بعض

بس المشكله لي صارو الحريم ما يتوالمون مع بعض

وحده نمامه .. ووحده ما تثمن الكلمه قبل لا تقولها .. ووحده من اهل الله مو من مستواهم

وثنتين اخلاقهم مثل بعض عقب كل يمعه يدقون على بعض ويحشون بالباجي

يعني لوويه مالها اول ولا اخر

..

زوجة احد الاصدقاء عليها قهوه مو طبيعيه

عقب ما شربتها طالعة بداخل الفنجان وقالت: بيييه مناف

فنجانك بيتكلم

قلت: شلوون

قالت: تحب اقرالك اياه

قلت: انا ما عندي هالاهتمامات كلشش .. وبعدين مالي خلق اربعين يوم ما تنقبل صلاتي

قالت: اهو مو صج حتى انا ما اؤمن بهالاشياء .. بس في اشياء بفنجانك واضحه

مو محتاجه تفسير .. طالع

(الشيطان لعب براسي .. صار فيني ابي اعرف)

قالت : عندك طريج ابيض كبيييير .. شوفه

هذا نجاحك انشالله وبتوصل للي تبيه

قلت: انشالله

وقالت: في بنيه صغير اهني قاعده تضحك

قلت: هذي ليّون الفصله .. بنتي .. تشابهها نفس الكشّه

:)

قالت: في وحده قاعده تطالعك .. شكلها مهتمه فيك وايد .. او تحبك

شوفها

طالعت والا صج وحده ويهها قمري وموجوده بطول الطريج الأبيض المرسوم لي

قالت: هذي انسانه راح تكون موجوده معاك بطول حياتك .. لك طولت العمر

قلت: بحياتج اللهم امين .. وبعد شكو بالفنجان

قالت: في حيّه طالعتلك

قلت: يا ساتر

قالت: ايه بس ما راح تقدر تأذيك .. لا تخاف .. مع انها قاعده تحاول بس كل الطرق مسكره بويهها

انت دير بالك عاد منها

قلت: عاد عسى حجمها كبير عشان اخذلي معاها فوتوغراف للذكرى

ضحكو اللي دار مداري

وقبل لا تنتهي من فنجاني

قالت: في وحده مبيّن انها ساجده ورافعه ايدها .. صج طالع جنها قاعده تدعي

طالعتها.. وقلت : هذي اكيد امي الله لا يحرمني من وجودها .. حبيبتي

..

في حياتك يا ولدي امرأةٌ

عيناها سبحان المعبود

فمها مرسومٌ كالعنقود

..

تحياتي للجميع واتمنى لكم عطلة صيف ممتعه

والقاكم انشالله بعد ما ارجع من الاجازه

مع ألف سلامه

اهداء

للذكرى حدود

ان نرجع مثل اول

نضحك

نتصارح

نتكلم

نهدي بعض

نلغي الحواجز بيننا

نشتاق

نزعل

نرضى

..

كلها امنيات ما راح تتحقق

وهالمره برغبتي

..

عندي صديق دايما يردد هالجمله

بعتي الذهب .. وشريتي التراب

!!

عز الله انه صاج

..

تدرون متى تنقال هالجمله ؟؟

اهداء

طــــــالعيني

لحظة حب

التقو فيها اثنين كانت تجمعهم قصة حب كبيره

مادري ليش قلت كانت تجمعهم قصة حب

مع انه حبهم لبعض ما عمره انتهى بيوم

ولا راح ينتهي

..

في العلاقات خاصتا لما تكون بين اثنين يحبون بعض

اوقات يوصلون فيها لي درجه ممكن انهم يحسون اذا كان احد منهم بداخله شي ومو قادر يقوله

او يمكن مو حاب يقوله

والا خايف يقوله

..

اهني بس كل اللي علينا نسويه

انه نمسك ويه اللي نحبهم ونقول لهم

طالعونا

حطو عينكم بعيوننا

يا كثر ما العيون تقدر تفضح كل شي بداخلنا

..

قلت لها شفيج عمري

قالت مافيني شي

قلت وغلاتي عندج تقولين

غورقت عيونها وقالت : احبك

قلت لها : اموت فيج

شاللي مضايقج حياتي

قالت: ما ابي اخسرك

قلت: ششش مابي اسمع منج هالكلمه مره ثانيه فاهمه

قالت: تعبت والله .. حابه حياتي معاك .. ما تتخيل شكثر

قلت: وربي ادري .. وانا هم حاب هالشي

انتي رجعتيلي شعور كنت فاقده من زمان

اهتمامج - حبج - غيرتج

محّد بحياتي حبني كثرج

قالت: ليش جذي يصير فينا

ليش .. ابيك تكون لي

ابي اعيش باجي عمري معاك

حتى لو كانت كل الظروف ما تساعدنا

والله مابي شي

بس ابيك ما تبعد لحظه عن عيني

عفيه .. لا تخليني

..

قلت: طالعيني

اوعدج .. بتّمين بحياتي مثل ما انتي

اكثر شي احبه بالدنيا

واغلى شي شافته عيني

..

اهداء

يحلمون

هلا بالكل

شلونكم

:))

انشالله تكونون بخير وصحه وعافيه

بخاطري اسولف معاكم شويّه

ممكن

..

طبعا الفتره هذي انا بقمة عطائي من جميع النواحي

بالدوام زايد اجتهادي ولله الحمد

يايني موود شغل

اكيد كل هذا بسبب الراحه النفسيه فقط لا غير

اما من ناحية الجهد الذهني والبدني

فمشغولٌ مشغولٌ مشغول

شلون؟؟

انا اقول لكم

حاليا اخضع لنظام غذائي قاسي وتمرين متواصل يوميا

لزوم السفر لأسبانيا الحبيبه

:))

حياتي اليوميه ما فيها ولا وقت فراغ

دوامي الصبح يبدي من الساعه 7 ونص لغاية ال 3 ونص أو 4 احيانا

ارجع البيت اكل لي وجبة قبل التمرين

طبعا يا سلطة تونه مع الخضار او ستيك مشوي او معكرونه بيضه مع روب خالي الدسم

وعليكم انتو تتخيلون

رجيم رجيم من صج مو غشمره

وعقب الساعه 5 اكون بالجيم

نص ساعه بالقاري وعقب تمريني حسب الجدول وبعدين تمرين المعده

بعدها بعد ما يبيله

السويمينغ بووول

تالي 5 دقايق بالجاكوزي

واخيرا دوش ماي بااااااااااااررررد

واتعطر واتكلين وابدل

اركب سيارتي متجه الى الاستيديو

ابلش شغل من ال 7 ونص لغاية ال 12 بالليل

ارجع البيت واخلد للنوم عشان استقبل يوم يديد

وعلى هالمنوال يوميا

..

اما من ناحية شغلي بالاستيديو

فعندي مسلسل فكاهي لكن اذاعي

راح تسمعونه انشالله في رمضان القادم

شغل عبط وضحك وفرفشه

مواقف يوميه نتعرض لها كلنا

سويتها بقالب كوميدي

وعندي وحده من الحلقات ذاكر فيها حتى سالفة التدوين

:))

المهم لا تحرموني من افكاركم للحلقات القادمه وانشالله تسمعونها برمضان

..

مادري شعندي بعد بقول لكم

اي

احب ابارك للعزيز عبدالله خريبط حصوله على شهادة الماجستير

واشكره على العزيمه الحلوه او السمره اللي اتحفنا فيها

مع الفن الياماني والفنان كرامه مرسال

..

ماني ناسي الأنس يوم الخميس اللي فات في مقر بن حسين بالرميثيه

والليوه

اهم شي اني رحت مع واحد من الربع ينقال له بوسعد

تونه داخلين الحوش وقاعدين نسولف

ما وعيت الا وهذا اللي هدني واستن على طول ومسك الطبل وطاحله معاهم

العرج يحن

والشباب طايحين له دوّاري

..

اخيرا انا خابر اللي يسوي سبا

يرتاح جسمه

انا العكس

جسمي حده متكسر

لا بارج الله بالتايلندي

وانا ما طحت الا بأيد هالمصارع

..

اعتقد البوست الياي راح يكون عن الحب الأولاني

:))

مع ألف سلامه

اهداء

شريط الذكريات

السلام

النسيان نعمه

!!صج عاد

اشوه انه لكل قاعده شواذ .. كل هالتمهيد عشان اوصل لنقطه معينه

مع تقديري لنعمة النسيان الا اني زاهد هالنعمه

يعني ممكن انسى وين حطيت مفتاح سيارتي او وين صافط بأي دور

او موعد الطبيب او تهنئة احد الاصدقاء بعيد ميلاده

لكن هذا كله ما يندرج تحت مصطلح النعمه .. اعتقد كلامي مفهوم

الموضوع واضح من عنوانه

بس عمركم لا تأمنون بعناوين مواضيعي

لأني مسرع ما اكسر فيكم

:))

المراد اذا كان النسيان نعمه

فآنا اقول النعمه زوّاله

..

شريط الذكريات

تخيلت انه افضل صديقه للغيبوبه اهي الذكرى

الله يبعد عنا وعنكم وعن احبابنا واحبابكم شر الغيبوبه

محطات تمر علينا طول فترة حياتنا تكون عادتا مثل الوميض

نسترجعها في الوقت اللي نلاقي فيه سبب لاسترجاعها

جلسه مع صديق قديم - يمعة الأهل - طاري لانسان غالي ودعناه وداع ابدي

..

شرايكم ندش بالموضوع

..

حكايتي مع الاعمى

بمناسبه من المناسبات .. التقيت بشخص اعمى

خفت عليه لايتعثر بالطريج .. ف مديت له ايدي

ابتسم ابتسامه حلوه وقال لي: لا تخاف علي .. ترى صج ما اشوف بس احس

ضحكت ورحبت فيه وقعدنا نتعرف على بعض

سألني: شسمك

قلت: مناف

وحضرتك

قال لي: انا الحب

ضحكت وقلت له: لا صج والله شسمك

قال لي: والله انا الحب

فكرت بعقلي والتفت للمكان شوي.. كان اشبه بالخيال .. مادري ليش حسيت انه ودي اصدقه

قال لي: ادري شللي يدور فبالك .. انت ودك تصدقني بس متردد .. عدل

قلت: صح شدراك

قال: مبين من ردت فعلك

....قلت: شلون قدرت تشوف ردت فعلي وانتااا

قال: عمي صح

قلت: العفو مو قصدي بس

قاطعني وقال: شوف مناف .. الحب شي ينحس ما ينشاف

انا كنت اقدر اشوف حالي حالك .. بس اخترت اني اظل عمي

اسألني ليش

قلت: ليش

قال: اذا كان عندك حبيبه وفجأه تعرضت لحادث وتشوهت راح يقل حبك لها

قلت: لأ ابدا

قال: ليش

قلت: لاني احبها

قال: لانك تحب شي بداخلها .. انت تشوف حبيبتك من الداخل

تهمك اطباعها .. طيبتها .. تقديرها لك واحترامها .. حبها .. معاملتها .. حنانها

قلبها .. اخلاصها .. ولهها وشوقها

يمكن تكون حبيبتك مجرد انسانه عاديه عند غيرك من الناس

لكن انت تشوفها غير

سكت شوي

وبعدين قال لي: بسألك سؤال

قلت: تفضل

قال: شنو الأهم عندك

شخص يشوفك .. والا شخص يحس فيك

قلت: اكيد يحس فيني

قال لي: مناف شوف هناك

قلت: وين

قال: طالع صوب ما اشعة الشمس نازله

شتشوف

قلت: حبيبتي

قال: تحبها

قلت: ما حبيت بحياتي كثرها

قال: تشوف الناس اللي دار مدارها

قلت: ايه اشوفهم

قال لي: دير بالك منهم

هذول ما يبون حبكم الطاهر يكبر

راح يحاولون انهم يعمون عينك او عينها

عشان لا تشوفون بعض

بس

قلت: بس شنو

مد ايده صوب صدري وقال

لا تخاف

انا معاك

بس خلني اقدم لك نصيحه

قلت له: قول

قال: طريج الخربطه ما في اسهل منّه

الكل يقدر يلعب ويلهى ويستانس

واللي يختار هالطريج انسان ضعيف

ما يقدر يطالع الشمس بعيونه

لانها راح تحرقه

امّا انت

فحبّك للشمس وشروقها ما يزيدك الا دفا وأمان

مناف

اذكر كلامي عدل

..

صوت الاجهزه الطبيه واسلاكها اللي ملت صدري

توقفت عن العمل للحظه

فأنا ما زلت في غيبوبه

تذكرت كل شي في هذي اللحظه

ارخيت جفني

لقيتج تقولين لي

مناف لا تخليني بروحي

الله يخليك

ضميتي ايدي حيل لصدرج

وقلتي بعبره

والله أحبك

..

رجعت لي الروح من ثاني

..

أموت فيج

اهداء

اعترافات مسائيه

يقولون عن الشخص اللي يصر على تحقيق رغباته

انسان طموح

بصراحه هالمره مالي خلق افسر كلمة طموح

لكن بقول لكم قصه تعبر عن هالمعني

كان يا ما كان في يوم من الايام

شاب يافع اسمه أحمد

أحمد هذا يستخدم النت بهوس

يعني مستعد يضيع كل يومه على النت ما عنده مشكله

المهم انه تعرف على وحده عن طريق التدوين

شفتو شلون التدوين شي مو هين

ديرو بالكم تسوون مثله

..

بالبدايه كان يعلق عندها بالمدونه حاله حال باجي البشر

وبعدين طبعا بالمقابل اهيا بدت تعلق عنده

فيها شي

!!

مع الوقت بدى الفضول يطغي على الاثنين

اولا لانها اهتمامتهم كانت متشابهه

وثانيا لانهم وصلو لي مرحله حسو فيها انهم يعرفون بعض

المهم انه في يوم عيد ميلاد لولوه

واللي اهي بطلة القصه

قام أحمد وبعث لها ايميل يتمنى لها حياة سعيده وعمر مديد

قامت لولوه وردت على الايميل بالشكر والثناء على ذوقه الراقي

وطلبت منه اذا ممكن انها تضيفه عندها بال أم أس أن

طبعا الخفيف ما ردها من الوناسه

..

يت ايام وراحت ايام وأحمد ولولوه مستمرين بعلاقتهم البريئه

لولوه بهالوقت حبت تسوي اختبارات حق أحمد

تشوف فيها هل اهو معاها اهيا بس اللي جذي جنتل والا مع كل البنات

قامت وافتحت لها بلوق يديد حالها حال وايد مدونين

وقامت تعلق عنده على انها معجبه فيه وبكتاباته

واهو عمك اصمخ .. ماكو استجابه سوى الردود اللي يرد عليها حالها حال باجي المعلقين

مع الوقت تبين انه لولوه اساسا عندها شخص تحبه

لكن كان مو مهتم فيها وايد فكانت تعبر عن اللي فيها عن طريق التدوين

هذي المعلومه اللي قلت لكم اياها ما كان يعرفها أحمد الا بعد مده من علاقتهم

فما كان عنده مشكله ابدا بالعكس كان وايد واقف معاها ويعلمها شتسوي

وشلون تتغلب على ضعفها

المهم انهم شالو الحواجز اللي بينهم

من بداية العلاقه .. يعني مافي تكلف ولا رسميه ولا تصنع

مره يسولفون عن الدين ومره عن المجتمع ومره عن الادب ومره عن الافلام ومرات عن الـ ...؟؟

بعدين صارت بينهم ثقه كبيره

اتصالات -مسجات - ايميلات

مع المده عرفو كل شي عن بعض

وجودهم مع بعض كان شر لابد منه

لولوه بدت تتعلق بأحمد

وأحمد كان اكثر شي يحبه اهو وجود لولوه معاه

..

اهو كان اكثر جرأه منها

واهيا كانت تمووت بجرأته

دايما كان يبين لها الجوانب الجماليه اللي فيها

واللي للأسف محد شايفها غيره

في يوم من الايام

كان أحمد بروحه قاعد بأحد الكافيهات

طرت فباله

قام ودز لها مسج يعبر فيها عن شوقه لها

قامت وردت عليه بانها حبت هالمسج

رد عليها بانه يحس بشي غريب اتجاهها

ردت عليه انه اهو دايما جذي يعني معاها ومع غيرها

رد اهو انها ما راح تعرفه اكثر من نفسه

اهني

صحى بداخلها شي

تذكرت انها تحب شخص ثاني

وما تبي أحمد يتعلق فيها اكثر

كانت صعبه عليها انها تقول له هالكلام

..

لولوه رجعت لحبيبها

واكتفت بالذكريات الجميله اللي تجمعها بأحمد

وبعض التعليقات في مدونته

وأهو

ما عنده الا الكتابه عن مشاعره اللي يحملها لها

وامنياته بأنها تكون سعيده وين ما كانت

انتهى

..

حسين الجسمي