اعجاب

اذا كانت قلوبنا تفز لوجود اشخاص نتمنى انه نشوفهم ونفرح بوجودهم

واذا كنّا نتفاءل بابتسامة ناس ونحس انه في ابتسامتهم تتلون دنيتنا

او اذا لقينا شي بداخلنا يخلينا غصب ننجذب لشخص لي درجه انه ودنا ارواحنا تحوم حوله

لا نفزع

لانه اللي قاعد يصيرلنا شي جميل

اسمه

اعجاب

..

لو تخيلتو معاي ان الدنيا اللي نعيش فيها عباره عن دروب

منها القصير ومنها الطويل .. منها البعيد ومنها القريب

واحنا نختار الدرب اللي بنمشي فيه

مهما كان اختيارنا

اكيد بنلاقي ناس تمشي معانا بالصدفه

لانهم اختارو قبلنا نفس الطريج اللي اخترناه

وفي ناس بعدنا احتمال تكون خطواتهم اسرع منّا

هم راح نلتقي فيهم

اذا بطئنا خطواتنا

او اذا وقـّـفنا التعب

..

في درب من هالدروب

التقو اثنين

بلقاهم ارتعش جسمين

وخفق قلبين

واحد منهم مد ايده وسلّم

لمس بيده اجمل وانعم وادفى ايد بالدنيا

كانت هذي البدايه

..

اجمل الايام

عاشوها مع بعض

في كل لحظه .. كانت لهم ذكرى

مواقفهم البريئه ملت عليهم الدنيا

حياتهم مليانه ابتسامات تعلموها من بعض

وفي الوقت اللي تقسى عليهم الدنيا

تلاقون لازم واحد منهم يتنازل عن راحته عشان الثاني

مادري هالنوع من العلاقات .. شيسمّونها

بس اللي اعرفه .. انه حياتهم وناسه

صداقتهم .. اخوتهم .. قربهم من بعض

كلها اشياء تعلمنا شلون نطالع القمر ونفرح لانه قاعد ينور علينا الطريج

وشلون نبتسم ونركض مع بعض اذا بللنا المطر

يا حلو حياتهم

..

كل سنه مرت عليهم .. زادتهم قرب من بعض

وصلو لي مرحله قامو يفهمون فيها بعض من عيونهم

بدون ما يتكلمون

قام كل واحد فيهم يقرا اللي بخاطر الثاني

وكثير احيان ينطقون بنفس الكلمه بوقت واحد

هالاشياء اللي قاعده تصير لهم خلتهم يتعلقون فبعض اكثر

ما كانو يسمحون للملل انه يتسلل مدينتهم اللي بنوها بيدهم

المدينه اللي اسوارها اكاليل ورود ملونه

وبيوتها انبنت من ثقه واحترام وود وحب وخوف كل واحد فيهم على الثاني

كانو يفتقدون بعض باللحظات اللي تغفى فيها عيونهم للنوم

كانو يتسابقون باللي يبين للثاني انه مفتقده اكثر

..

ما قد فارق لياليهم القمر

ولا يوم غفى عنهم السهر

كانت ذرات الهوا تفرح وتتسابق عشان تنقل اصدق مشاعرهم لبعض

يقولون الصوت بالليل يسري

وقف جدّام عيونها

الخجل تركهم ووقف بعيد عشان لا يحرمهم من هاللحظات

ارتعش جسمه

قال لها: ممكن اسألج سؤال؟

قالت: قول عمري

قال: شاللي عاجبج فيني

قالت له: حبيبي انت .. وايد اشياء

قال لها: شنو اكثرها

قالت له: اولا حسيت براحه معاك .. ووو احب شخصيتك .. طريقة كلامك .. حنّيتك وخوفك علي .. اهتمامك فيني .. اممممم وهم بعد احب فيك شي

قال لها: شنو

قالت له: حلجك جنّه حلج بطّه

اهوابتسم اهني

قالت له: صج ترى صج حلجك عوي بس اينّن .. احبّه

انزين انت قول لي شنو اكثر شي يعجبك فيني

قال: شوفي انا بحياتي ما تعلقت الا بثنتين

انتي

وخدامتنا وانا صغيّر كنت هم احبها ومتعلق فيها

حتى يوم سافرت موّت نفسي من البجي

:)

قالت له: خدامتكم هاا.. مشكور وما تقصّر

قاطعها وقال: لا والله لا تزعلين بس انا ادري عنج تقولين حلجي عوي!! قلت اردها لج

قالت: لا والله جد قاعده اكلمك .. شاللي تحبه فيني

قال: وربي ما اقص عليج اذا قلت لج اني احب فيج كل شي

يعني احس انج انتي الانسانه اللي كنت اتمناها

وبجد فرحان لوجودج معاي

احب فيج اشياء ما اقدر اوصفها

منها ملامحج البسيطه

تقاطيع ويهج

فيج شي مميز

تدشين القلب بسرعه

سوالفج حلوه

طبيعيه.. ما تحطين مكياج

واذا حطيتي بالمناسبات تصيرين اميره

وبعد شي

قالت بهدوء: شنو

قال: احبج

قالت له: شششش

قال لها: شفيج

قالت له: تكفه اسكت شوي

قال: سكت

تمت اتطالعه فتره بدون ما يتكلمون

بعدها قالت له: غمّض عيونك

قال لها: ليش

قالت: عفيه غمّض عيونك شوي

قال لها: غمضت