غاوي

هلا ومرحبا بالاحباب .. البعاد والقراب

انشالله تغمر السعاده قلوبكم وين ما كنتو

..

موسم سفر

الكويتيين قلوبهم صلبه اسمالله عليهم

احب يراعتهم

العمر نعيشه مره وحده

بلا انفلونزا خنازير بلا انفلونزا بعارين

:)

..

هذا الصيف كان عامر بالاحداث والمواقف الحلوه

قررت اسافر بآخر لحظه

كنت متردد بالبدايه

اروح .. مارووح

والدة رفيجي تكلفت فجأه واستوجب عليه نقلها لي لندن

اااااه يا لندن

تشفي العليل

كلمني وقال .. مناف تكفه ابيك وياي

قلت : يا ولد لا تقول تكفه

تكفه تهز الرياجييل

:)

والله واتجهت لمكتب احد الاصدقاء

وحجزت كويت - دبي دار الحي - لندن العظمى

المهم ان الاخوان بالسفاره البريطانيه يزاهم الله خير

استحدثوا خدمه يديده لل في اي بي

امثالي

استغرق استخراج الفيزا يومين بالتمام والكمال

وصار اليوم الموعوود

ودعت اسرتي الصغيره

وقبلتهم

ورحت المطار

..

عاش مطارنا

لا تنظيم ولا فخامه ولا بريستيج ولا عماة عين

واقفين بالكيوو

ناس بظهر ناس

واللي يطقك بجنطته .. واللي تحوش مرته بالغلط ويخزك

اصلا مرته قاعده تضحك لي

بس عادي طوف مو وقته

:)

..

ركبت الطياره الاماراتيه

والا يمي واحد ديّن

قرر انه مالي حق احط ايدي على التكايات

فقصني الله يفقصه دنيا واخره

:)

طبعا البلاك بيري لي اخر لحظه شغال

اكتب اخر الاحداث وادزها برودكاست مسجز

وصلنا دبي

اساسا انا منسق اني ابات في دبي ليله

وثاني يوم اطير لندن

نزلنا مطارهم

والا شنو مطار ماشالله عليهم

فخم وشرح ومرتب ومنظم

واللي بالكاونترات لابسين لبسهم الوطني

الكندوره والغتره والعقال او اللفه الحمدانيه

المراد عدينا هالمرحله

وين حجزك يا بوالنيف

فندق الجميرا بيتش

مكان حلو وراقي ويليق بمقامي

:)

طبعا الحين بتقولون لي ليش مو الاتلانتس

هبة الكويتيين كلهم هناك

بصراحه الفندق وايد واااو

بس يبيله لو اليهال معاي

وانا مسافر بروحي

شنو

مسافر بروحك مناف

اي والله

:))

..

طبعا شقول وشحجي عن الفندق وفخامته

وعن الاستقبال والخدمات اللي فيه

والا فيو الغرفه اللي يطل على برج العرب

وتحتي حمامات السباحه ومرسى اليخوت

ترى بس مليت

كل هذا اللي قاعد اقوله عن يوم واحد

انا ابي اتكلم لكم عن لندن

راح اختصر الاحداث

ثاني يوم ركبت طيارتي متجه الى لندن

وانا بمطار دبي

لحظه خل اقول لكم هالسالفه اللي تفشل

ماكو غرف للتدخين بمطار دبي اليديد

وباقي ساعه على الطياره

قمت وسألت وين اقدر ادخن

قالولي بالترمينال القديم

يم البوابه رقم 150 اعتقد

طبعا مشي كيلو الله يهداهم

وصلنا غرفة التدخين والا فيها اجانب وهنود ومضيفات

وانا وواحد اماراتي

طالعته وابتسمت

قالي انت من الكويت

قلت له ايه سماهم على وجوههم

:))

سألني

وين ساير بويه

قلتله لندن

وحضرتك

قال انا ساير تايلند

قلتله درب السلامه

قال الله يعينك

جيف بتدوخ احيينه .. وراك سبع ساعات

قلت له لا انا عادتا ما انام بالطياره

ضحك وطوف السالفه

انا تالي فهمت انه تدوخ عندهم يعني تدخن

:))

..

وصلت لندن

خلصت الاجراءات بالمطار

وطلعت بره عشان الم الجو

والا براد من اللي يحبه قلبكم وقلبي

السياره ناطرتني

بيينا على الفندق

ثيستل ماربل آرتش

باختصار كانت الرحله من امتع الرحلات اللي عشت فيها كل لحظه بسعاده

حطيت اغراضي وركض صليت ما بالذمه

وطلعت .. تاكسي تاكسي

ودني حق رفيجي اياد بلندن كلينك

بروح اتطمن على والدته

وشفت اياد

مادري ردت له روحه اول ما شافني

وعانقته عناق الاحبه

وتطمنت على والدته

وتالي .. بدت الحياه

يا حلو الذكريات

التشعبط بالباصات والتمشي بالشوارع

تحت المطر .. وشاورما الدياي

ريجينت بارك

رحلاتنا لي الملحق العسكري

اوكسفورد والسوق

الهدوم

القهاوي

الضحك

الهنوود هناك مالهم حل

ماشالله بناتهم جد جميلات

كل يوم موقف

وطايحين له تصوير

وناسه ما بعدها وناسه

الاسابيع الثلاث مرت مثل البرق

للحين عانه علي قلبي

ودي ارجع

بس حسافه ما اقدر والسبه الدوام

رجعت الكويت

وقلبي للحين متعلق هناك

..

كل اللي كان ينقصني برحلتي هذي

انتي

كنت اشوفج بكل مكان اروحله

..

الظاهر اني غاوي حب

ومافي شي احبه بحياتي كثر وجودج فيها

اهداء

كلكم تتشابهون

كان عندي امل قبل ان الناس كلها تعيش عشان عندها قلب

طول ماهو ينبض .. طول ما حياتهم تكون مستمره

واللي عنده مشكله بقلبه ما يعيش

يعني عشان العين تشوف

لازم يكون القلب ينبض

عشان نتحرك ناحية الناس اللي نحبهم

لازم يكون القلب ينبض

عشان نبتسم وعشان ندمع وعشان نشكر وعشان ننقم وعشان نكبر وعشان تكون عندنا ذكريات

لازم يظل ينبض هذا القلب

..

وعشان نحب

لازم ينبض هذا القلب

لما حبيت كان عمري صغير

وكان قلبي صغير

ركضت مع نبضات قلبي لما لقيت انسانه تلوح لي بيدها .. في الناحيه الثانيه من طريج الحياه

حسيت انها تقول لي .. تعال

الطريج اهني

خلك معاي

عادي امسك ايدك

غمض عيونك

احبك

..

فتحت عيني

والا اهي مو موجوده بهالطريج

كانت هناك

بس كاني قاعد اشوفها

جدامها واحد مغمض عينه

قاعده ترتل له مشاعرها

..

كبرت بعدها

وكبر قلبي معاي

حلفت اني ما اغمض عيني مره ثانيه

مشيت بشارع كانت كل الناس معاي تمشي فيه

كانو كل اللي حولي مغمضين عيونهم

ويرتلون نفس الجمل

تعال

تعالي

الطريج اهني

خلك معاي

خلج معاي

عادي امسك ايدك

عادي امسك ايدج

غمض عيونك

غمضي عيونج

احبك

احبج

..

بس انا معاها ما كنا نبي نغمض عيوننا

سألتها .. انتي ليش مو مثلهم

قالت لي هذول جذابين

قلت لها ادري

قالت لي الحمدلله اني لقيت انسان فاهمني

قلت لها الحمدلله اني لقيت انسانه فاهمتني

احنا غير عنهم

اي احنا غير عنهم

انا كنت مثلهم وفتحت عيني ما لقيتها

اهيا بعد لما فتحت عينها ما لقته

ما تتصورين شكثر فرحان اني لقيتج

وانا بعد .. ما تتخيل شكثر كنت محتاجه لواحد يفهمني مثلك

مستعده نكمل مع بعض هالطريج

اكيد

وين نروح

كيفك

عطيني ايدج

هاك

غمضنا عيوننا

سويننا مثلهم

..

النهايات في الحياه دايما تتشابه

..

اهداء

الدوبلير

بالبدايه احب اقدم لكم حب ماله اخر

وشوق يكحّل الناظر

من شخص حيل يغليكم

سمى نفسه الخاطر

:)

..


بعد السلامات .. والتحيات .. واللمات .. والبوسات

خلوني ابدي بالموضوع اللي طال انتظاره

..

الدوبلير


هذا المصطلح يستخدم غالبا في صناعة الافلام



الدوبلير : هو الشخص اللذي ينوب عن الممثل او البطل في القيام بالمشاهد الخطره


حيث يقوم مخرج العمل باستبدال الممثل بشخص متمرس يمكنه اداء المهام الخطره نيابتا عن بطل الفلم


كل ما على الدوبلير هو انهاء المشاهد وأخذ نفس راكور الممثل

الراكور : هو الزي اللذي يرتديه البطل بالاضافه الى اللوك

حتى لا يلاحظ المشاهد الاختلاف بينهما

..

الا ان هناك بعض الابطال يقومون بأداء هذه المشاهد بأنفسهم

لدي مثالين الأول منهم الممثل العالمي : جاكي شان

والآخر هو : أحمد السقا مع فارق التشبيه

:)

..

لا اخفيكم

فكل منا له حياه اشبه بالافلام

لها بدايه ووسط ونهايه

تتخلل هذه الحياه مواقف كاللتي نراها

بعضها مفرح والبعض الاخر محزن

بعضها نستطيع تحمله والبعض الاخر نحتاج فيه الى دوبلير

..

اصحاب النفوذ احيانا يلجأون الى دوبلير يقوم عنهم ببعض الاعمال التي لا يريدون ان تكون مستمسك عليهم

الغلابا اللذين يشعرون بنقص في شخصياتهم يلجأون احيانا على ايهام الناس بأنهم ذوو اصول ماسيه لمجرد ارتداءهم زي دفعو ثمنه كل ما يملكو من نقود وكرامه

الامهات ايضا قامو بالاستعانه بدوبليره تقوم عنهن بواجبات الامومه


..

ابهات الزمن الجديد


يسوءني ويدمي قلبي .. قراءة خبر يتعلق بقتل والد أولاده

تبا لذلك القلب

وتبا لذلك الأب

..

هناك من يتمنى ان ينعم الله عليه بمولود

والاخرون يمثلون بجثث ابناءهم

..

هنيئا لأولياء الامور الصابرون .. والشاكرون لنعم الله

فمنهم من وهبه الله بطفل معاق .. ومنهم من اعطاه الله طفل مختل عقليا .. واخرون توحديون .. واخرون مصابون بامراض لا يشفيها الا الله سبحانه

ومع هذا شكروا ربهم وحمدوه على هذه النعمه .. واحسنو معاملة ابنائهم بل ومنهم من شقى وتألم وظل صابرا

لهؤلاء اقول

انتم على راسي من فوق

..

في نفسي اشياء كثيره اود مشاركتم بها

لعل في البوستات القادمه ستجدون ما يرضيكم

عذرا على هذا الموضوع اللذي لم اشأ ان اكدركم به

ولكن شيئا كان بخاطري


:)

..

في البوست القادم سأتكلم عن الحب

لطالما جبلت نفسي على ان اكون ينبوعا له .. ليرتوي منه الجميع

..

ادري ان هالوقت موسم سفر

ولأني توني ياي من بلد الضباب

ولي ذكريات ما تنسّي هناك

حبيت اهديكم اغنية السفره اللي كانت معلقه معاي


:)


..


اهداء

قلوب لا زالت تمارس الصدق

يا احلى من في هالدنيا

يالغاليين على قلبي

شلونكم

:)

..

كل مره لما ايي ابي اكتب لكم بوست

اتوهق شبتدي فيه

افكر شلون ارحب فيكم

شنو الموضوع اللي بتكلم عنه

كم واحد بيقراه

اللي فبالي قاعدين يقرولي والا لأ

:)

..

شطانه

..

سؤال وجيه: ظل احد للحين ما عنده بلاك بيري

شهالصرعه العجيبه

وشهالانتشار الصاعق والساحق يا علكم الماحق

كل ما دخلت مكان لقيت الناس كاتبه

my B.B code 3.9.1976

لحد يسجل هالرقم

ترى هذي مواليدي

..

يعني كان موضوع لافت انتباهي مثل ما اشياء كثيره تشغل انتباهنا

وتستحق التفكير والتأمل

في كل رحله من رحلاتي

اهتم اني اكون موجود بالمطار قبل موعد الاقلاع ب 3 ساعات عالاقل

احب اتمشى بالمطار

سوى في مطار الكويت وانا رايح او حتى بعودتي من مطارات الدول اللي ازورها

مو بس انا .. اغلبنا يحب اجواء المطار

المهم لين يعلنون عن قرب اقلاع الطياره

وضرورة توجهنا للبوابه

بعد ما يبيله

اخر شي اسويه

احط ايدي بمخباتي عشان اطلع باكيت الزقاير واشرب لي وحده تصبرني لين اوصل

..

وانا داخل الطياره

وبالتحديد لما اكون بالجو

احب اطالع من الشباك

قطع الارض المجزأه

ملاحظينها

تلاقون الاراضي تحتنا تكون محدده كأنها مزارع او مادري شنو

بس دايما تلفت انتباهي

..

وايد اشياء تغيرت عن الاول

وايد اشياء حلوه كانت موجوده قبل .. ما عدنا نشوفها الحين

العوايل تقسمت

الناس ما عادت تحترم بعضها بعض

صار الكل يتصيد غلطات الثاني

ما عادت الناس تتعامل بصفاء النيه

ولا بحب .. المحاكم امتلت بقضايا الاخوان ضد بعضهم بعض

المخافر امتلت بمشاكل الجيران مع بعض

الخوف من الله صارت بس كلمه تنقال من غير فعل

لا الدينيين صارو دينيين ولا المثاليين عادو مثاليين

الكل يصارخ بوقت واحد

ضوضاء بكل مكان

اغاني بكل مكان .. اناشيد تجاريه بكل مكان

اذاعات بكل مكان .. قنوات تلفزونيه بكل مكان

اوبريتات بكل مكان .. صور الناس بكل مكان

عبدة الشيطان بكل مكان .. ناس بلا تربيه بكل مكان

صبيان مزعجين بكل مكان .. بنات هايتات بكل مكان

قمت اتشائم لما ابطل الجريده واشوف صور الملتحين

اللي لا بويهم لا دين ولا بركه

قمت اتضايق لما اسمع ريال يصرخ مثل الحمار والعن

اتضايق لما تطلع وحده وتنسف دور كل المجتمع وتطلع بس اهي اللي تفهم

ودي اتقدم باقتراح حق المجلس القادم

اتمنى انه يكون التصويت

عباره عن موزه وينكتب عليها اسم المرشح

كل ناخب يكتب اسم المرشح اللي يتمنى انه يمثله على الموزه

وطريقة الفرز تكون

على كل مرشح اكل الموز اللي عليه اسمه بالكامل

واللي يخلص كل الموز اللي عليه اسمه

اهو الشاذي

عفوا اقصد اهو المرشح اللي يستحق انه يمثل المجتمع ويناقز للدفاع عن قضاياهم

..

لن ارغمكم على هذا

ولكن املي ان تختارو جيدا

تكفون

الدينيين مكانهم المسجد

مو قاعة عبدالله السالم

..

د. اسيل العوضي .. معاج لي نهاية المطاف

وانتي الوحيده المستثناه من معادلة الموز

:)

اتمنى لج النجاح يا رب

..

ختام كلامي

اقول لو خليت خربت

صحيح الطاغي سيء

لكن هذا ما يمنع من ان الناس الزينه لازالت موجوده

والناس اللي تستحق الاحترام والتقدير لازالت موجوده

فهناك دائما من يجيد الحب

وهناك ايضا قلوب لازالت تمارس الصدق

ــــــــــــــــــــــــــــــــــــــــــــ

اهداء

الكباريّه

من الاحلام اللي تراود اغلب البنات

اهو انها تحصل على فارس احلامها

منهم تتخيله بأوصاف معينه

طويل - عريض - اسمر - جميل - غني - مثقف .. الخ

ومنهم تاركه المسأله على البركه

اللي ايي من الله حياه الله

الا انه التفكير ان غاب عن البنت .. ما يغيب عن الام

او العمّات او الخالات

عدد الأثرياء بالعالم ما يتعدون الخمسين

وماشالله الكل حاط عينه عليهم

..

في عوايل الجشع عامي عينهم

يحسبون اذا زوجو بنتهم حق واحد غني خلاص

بتتوفق

راح تشتري كل شي بخاطرها

من جناط وهدوم وعيالها بيدشون مدارس خاصه

وبتركب بورش وبتسافر كل سنه دوله

و و و و

في مثل فلسطيني دايما استخدمه بهالمواقف

يقول : العز على النوَر .. بهذله

..

الحين يعني انا اذا قلت هالكلام بصلح الكون

طبعا لأ

بس اهي كلمه ممكن تفيد شخص او يمكن تأثر بمشاعر ناس قاعده تتعذب لنفس السبب

..

انا ما اقول ان الكبّاريّه سيئين

والّا يخونون حريمهم

لكنهم عرضه لضعاف النفوس اللي ما يفكرون الا بالماده والفلوس

..

في بنت حبت لها واحد ولد عز

البنت كانت حالتهم الماديه عاديه جدا

كان اكبر همها انها تتزوجه

وعشان توصل لي هالمرحله

لازم تمر بمراحل ثانيه كثيره

ضحت بوايد اشياء

كانت تطيع كل شي يطلبه منها

تكشت بمحاضراتها عشان تطلع معاه

تقص على اهلها وتحط نفسها بمواقف محرجه

بس عشان ترضي غروره

ادخلت بسكه مو سكتها

عاشرته معاشرة الازواج

وعاشرها معاشرة الانذال

داس عليها بأحقر وارخص احذيته

اللي يرخص نفسه .. ترخصه الناس

اهي كانت تفكر شلون ترضيه وتحقق حلمها بأنها تكون زوجته

واهو يفكر شلون يقضي عزوبيته بطريقته الخاصه

لين تتخرج بنت رفيجة امه اللي من مواخيذهم

عشان يتقدم لها ويتزوجها

!!

..

انتهت القصه السخيفه

انشالله القى من يتعض منها

..................................................

كلام خاص

لانسانه عزيزه على قلبي

بيني وبينها ايام حلوه .. ومواقف ماني ناسيها

انسانه تجمعني فيها صداقه واخوه ومعزّه

ولهت على ايامنا الحلوه

ولهت اسمع سوالفج

ولهت على عزايم الاكل

ما كنت اتصور انه في شي ممكن يخلينا نبعد كل هالمده

ساعات اقول احسدونا والله

انا ادري اني ماني ملاك

ومعرض للغلط

ونفس الشي انتي

!!

انا مو ياي اعاتب

ييت اقول

اني بجد فاقدج

وهم بخاطري اقول كلمه

ومن قلبي

انشالله تلقى لقلبج مكان

هذي الاغنيه احبها

وحبيت اهديكم اياها

اهداء

انا الشعر

انا الشعر

وهامتي مطلع قصيد

وانا اللسان اللي يجيد

يطوّع الحرف العنيد

..

انا الشعر

انا الشموخ بعزّتي

وانا الرضوخ بطيبتي

وانا اللي كاتب قصتي

على صفايح من حديد

..

انا الرضى وانا الزعل

وانا الصعب وانا السهل

وانا لكل منوه أمل

حتى ولو اني بعيد

..

محّد على بعادي صبر

سألو اللي حاول

ما قدر

دوّر له كم حل وعذر

حتى ارد له من جديد

..

:)

ترى ما خلصت القصيده

كانت مجرد شخبطه كتبتها بالدوام

ولأني اعاني من افلاس فكري

قلت انزلها

..

على ظهر الورقه كتبت حوار بيني وبين قاضي يتهمني بتقبيل حبيبتي

القاضي: انت متهم بتقبيل المغدور بها

انا : نعم فعلت

القاضي : لماذا

انا : دفاع عن النفس

ضحك الحضور

القاضي : سكووووت .. سكووت .. لو سمحت هذي محكمه مو مكان للتهريج .. جاوب على قد السؤال .. لماذا ذبحت المغدور بها بالتهجم على شفاتها واستخدام احلى طريقه لذيذه ممكن تتعرض لها البشريه بالموت السريع .. جاوب؟

انا : حلجها يشوّق

القاضي : يعني تعترف

انا : اوووففف

القاضي : ممكن تمثل لنا الجريمه

انا : حضرة القاضي .. عن الشطانه .. يووز

:*

اهداء

للحب معنى اخر

اولا .. السلام

وبعد السلام شكرا للي دفعني للكتابه مره ثانيه

وشكرا لكم على تحملكم فترة غيابي

..

باختصار قعدت بيني وبين نفسي افكر بكلمات تحمل معنى مشابه لكلمة احبك

قلت بقلبي هل لازم اقول هالكلمه عشان ابين للي احبه اني احبه

طيب شلون اقدر اعبر له عن حبي من غير ما استخدم هالكلمه

اكتشفت اكثر من كلمه ان استخدمتها راح يفهم الشخص اللي احبه مشاعري اتجاهه

لو فهمنا اهمية ان يكون عند كل واحد فينا انسان يحبه

لو عرفنا وقدرنا اهمية وجود هذا الشخص بحياتنا

ما كنا حسينا بالوحده اللي اغلبنا حاسها

..

بحياتي اللي عشتها

وبالتجارب اللي مريت فيها

فهمت ان كل ما تحتاجه المره اهو الاهتمام

انك تهتم فيها هذا يعني انك تحافظ عليها بعيونك

تسمعها .. تعيش معاها .. تشاركها الامها وافراحها

تنصحها .. تحسسها بقيمتها

بالمقابل راح تعطيك الدنيا وما فيها

البنات لي حبوا .. يغنونك عن 60 ريّال

والله وبالله .. ما كتبت هالكلام عشان ازيد من شعبيتي عندهم

على فكره انا معروف بمواقفي مع حواء

انا اكثر من يهتم فيهم .. ويداريهم .. ويسمع لهم

وبنفس الوقت .. انا اكثر من انقرص منهم

في حياتي كلها

والامثله عندي كثيره مابي ادوشكم معاي فيها

بس ما غيرت رايي فيهم

ولا عممت بأنهم ما يستحقون كل اللي كنت اسويه عشانهم

لاني بالمقابل حملت منهم ذكرى ملت علي حياتي

وتعلمت من تجاربي معاهم شلون اتغلب على اي مشكله قد تواجهني بالمستقبل

الطريف بالموضوع

اني عند كل مشكله مع وحده منهم القى اللي توقف معاي هم مره

:)

..

ما علينا من هذا كله

بأيام الجامعه .. كان عندنا نشاط من احب الانشطه على الطلبه في ذاك الوقت

كان يتم التنسيق عن طريق اللجنه الاجتماعيه لقائمة الوسط الديمقراطي

اسم النشاط .. خليفه سكوول

او مدرسة خليفه .. هذي المدرسه مختصه بالطلبه اللي قدرتهم العقليه اقل من عمرهم

كان في هذا المهرجان يتم بيع المعروضات وريعهم يروح لصالح الاعمال الخيريه

الفكره من حيث المبدأ جميله جدا

بس تعالوا نسولف عن اللي كان يصير هناك

الكل كان يحرص على حضور هذا السوق الخيري بكامل اناقته

الشباب اللي مغتر مغتر واللي ستايل لابس ذاك الجاكيت الجلد

والبنات كل وحده وقروبها .. على سنقة عشره

واخذوا عاد

اشي خز واشي ترقيم واشي مواعد

..

صاحبنا ما طاحت عيونه من هالبنيه

معاه بالكليه

وشافها الحين يايه السوق الخيري

هدنا وراح وراها

يا ابن الحلال

يهديك يرضيك

ماكو .. عمك اصمخ .. اصلا ما قام يشوفنا مووليه

قوم عقب كل هاللف والدوران والمكان زحمه ناس بظهر ناس

يت طلعت البنت لحقها للسياره

وقال لها: لو سمحتي

حقرته

توها بتسكر الباب جان يقول : عفيه لحظه سمعيني الله يخليج

قالت له: نعم

قال لها: في مجال

منو يقول في مجال هالايام

هي هي

قالت له : لأ طبعا وروح لا يصير لك شي مو طيب

وارقعت باب السياره بويهه وحركت

..

ضحكنا عليه بصراحه .. قلناله شتسوى على امك الحين

شفطت بويهك .. واهو يرجف من الاعصاب

فشله .. كان في ناس قاعده تطالع المنظر

صاحبنا كانت نيته شريفه

من صج كان يبي يتعرف عليها ويتقدملها اخر كورس له قبل التخرج ومن يشتغل يتزوجون

عقب الحركه اللي سوتها فيه تقولون حرّم

بعد ايام راح وحط رقم تلفونه على باب سيارتها

بنفس اليوم ياله اتصال من واحد يقول له ان شفتك تعرضت لها مره ثانيه بلعن والدي والديك تفهم

:)

اهني بس خلاص حقرها

قال هذي وراها مشاكل وانا بغنى عن هذا كله

..

المشكله لاحظت ان احنا لما تصير لنا مشكله مع احد يتم شاغل تفكيرنا طول الوقت

حتى لو دار مدارنا ناسنا وربوعنا وغيره وخلافه بس هم يظل المتصدر اهو الشخص اللي صارلنا معاه الموقف

هذي البنت عقب اللي سوته .. حست بتأنيب الضمير

الولد كان يحاول قدر المستطاع انه ما يلتقي فيها

مع انهم بنفس الكليه

غيّر البوابه اللي كان يدش منها

ما قام يقعد بالكليه كلش

واذا التقى فيها بالصدفه بالساحه ينزل راسه ويمشي بطريجه

بالبدايه كان عادي عندها

اصلا ما بقت وحده من رفيجاتها مادرت بالسالفه

كانت تمشي وتقول حق البنات

والكل كان يضحك بالبدايه

بس بعدين يوم حسوا ان الولد محترم ومتربي

تغيرت فكرتهم عنه .. تعاطفوا معاه

لي درجه انهم قاموا يتحاشون رفيجتهم هذي

صارت منبوذه والسبه تصرفاتها الغبيه

وثرثرتها اللي عالفاضي والمليان

عقبها تخرج الولد

وتزوج وحده هم كانت معاه بالجامعه

وهذا اهما الحين عايشين احلى عيشه

وعندهم اولاد

وهذيك بعد تزوجت بس عايشه حياه بلا سعاده

..

احيانا نشوف بحياتنا ناس تعجبنا اشكالهم

نحس انه ودنا نرتبط فيهم

او يمكن نحط في بالنا انهم اهم اللي الله كاتبهم لنا

ونتحمس عشان نتعرف عليهم

بس بالنهايه

نكتشف ان الظاهر اهو اللي عاجبنا بس

اما الباطن فشيء سيء

ولا يستحق العيش معاه حتى ولو ليوم واحد

للحب دائما معنى اخر

..

وموشرط اقول لج احبج عشان تفهمين مشاعري

احيانا .. تصبحين على خير لها نفس المعنى

تصبحين على خير

اهداء

!بيرجع

قطعت اوراق وردتها الاولى

مابين يرجع أو ما يرجع

وما اكتفت

كان الجواب غير اللي تتمناه

ما يرجع

!!

..

اهداء

any body there ?

الاصدقاء والقراء والمتابعين الكرام

هل ما زلتم على العهد الذي فارقتكم به

:‏)‏

انا تملاني الرغبه بالكتابه


للحينكم تحبون اللي اكتبه

والا اكمل البيات الشتوي !!