Wednesday, March 26, 2008

حُرمةْ جَسَدْ

السلام

ادري طولت عليكم بس ماعليه عذروني مو بيدي والله كنت مشغول

ادري في وايد ناس مرت علي بالمدونه وقرو العنوان وقالو شيقصد مناف بالتايتل

ما اخبي عليكم كان في موضوع قاعد يدور براسي طول الفتره اللي طافت

وناوي اكتب عنه .. من كثر ما انا مشغول فيه حلمت اني كتبته وكان العنوان حرمة جسد

قعدت من النوم والا القى نفسي نسيت العنوان .. بصراحه ضاق خلقي وقعدت احاول اتذكره لين ذكرته

حرمة جسد .. اشياء كثيره من حولنا لها حرمه

المسجد له حرمه

البيت له حرمه

الميت له حرمه

والحياه الزوجيه لها حرمه

والجسد له حرمه

!!

قعدت افكر بالكلمه

هل معناها التحريم ام الاحترام

لقيت الاقرب على قلبي اهو الاحترام

..

في اشياء عند غيرنا نتمنى لو انها تكون عندنا

و اشياء عندنا يتمنونها غيرنا

وفي اشياء كانت عند غيرنا وصارت لنا

واشياء كانت لنا وصارت عند غيرنا

..

ادري بتقولون خير مناف شفيك

!!

كان عندنا بيت قبل احبه

كل ذكرياتي كانت بهالبيت .. كنت ادخل البيت وقت ما ابي

واطلع منه وقت ما ابي

تالي بعنا البيت .. وصار ملك ناس غيرنا

هذا الشي كافي بانه يمنعني من دخول البيت اللي ربيت فيه

وحتى لو سمحولي اني ادخل

فما راح اكون اكثر من ضيف .. والواجب علي اني اراعي حرمة هذا البيت

ماراح اتمدد بالصاله واجابل التلفزيون مثل اول

ولا راح اقدر اسبح بحمامي اللي فيه شامبوي وعطوري ورغوة الحلاقه وفوطتي

ولا راح اتمشى لي المطبخ عشان اخذلي بطل بيبسي وادخل غرفتي

غرفتي اللي كنت ادرس فيها وانام فيها واكلم حبيبتي فيها

!!

..

من يقول انه المناسبات السعيده مافيها اشياء محزنه

بس عادتا محد يحس فيها

يمعة شباب على العشا

من الحضور اثنين

واحد منهم زوج لانسانه كانت حبيبه لشخص يجلس بجواره

رن تليفون الزوج

قالت له ها عمري متى بترجع

قال لها الحين بس لا تنامين نطريني

سكر التليفون

والتفت على اللي يمه وقال

هذي المره دايما تحاتيني عسى ما تأخرت بره دقت تسأل وينك يالله متى بترجع

قال الثاني

الله يهنيكم

وطلع من المكان بسرعه

بصدره غصه وبعيونه دموع ما قدر يمنعها انها تنزل

ركب سيارته ومشى

لقى نفسه وصل لي مكان تعود انه يلتقيها فيه

غمض عينه

وتذكر اخر مره التقو بهالمكان

كانت بكامل اناقتها

عطرها انصهر مع برودة التكييف بالسياره

انغمر مع مشاعرهم

ملى كل المكان

سهى بعيونها وبويهّا وبشفايفها

وقال بقلبه

الله لا يحرمني منج

الله لا يحرمني منج

الله لا يحرمني منج

الله لا يحرمني منج

..

اهداء

Sunday, March 16, 2008

اللي بالقلب




حكمه: سهل انك تحب الناس


بس صعب تخلي الناس تحبك


..


احيانا الناس تظهر لك شي


وتضمر بقلبها شي ثاني


..



البعض يتصنع الحب


وقلبه مليان حقد


..


والبعض يتصرف معاك بحماقه


ولكن قلبه يكن لك الحب


..


خارج الموضوع: تعاملو مع الناس بأخلاقكم


مو بأخلاقهم




..

Saturday, March 15, 2008

تسأل الأغراب


تسأل الأغراب عنّي
وعن سبب ضيقي وهمّي
ما وعيت الا ودموعي
تجرح عيوني بدمّي
صاحبي وعمري وصديقي
كان ابوي وكان امّي
كان لي منّي فقدت الكون كلّه
والتفت القاه يمّي
..
كان اسمه
يبدي بالحرف اللي يبدي فيه
إسمي
..

Thursday, March 13, 2008

ما أرجع


تحلفين والله ما ارجع
خلاص فاض الصبر فيّا
وبعد يومين او اكثر
اشوفك ترجعي ليّا
..
تقولين السبب حبّي
وانّي مقصّر شويّه
انا شذنبي اذا كنتي
اكثر منّي حنيّه
..
تعرفي وش هي عيوبك
هالغيره الخياليّه
تقولي واثقه منّك
وعيونك تشك فيّا
..
على كل هذا ما اقدر
دقيقه ابتعد عنّك
تعالي .. قرّبي صوبي
يا عمري واحسني النيّه
:)

Saturday, March 8, 2008

لا تزعلين


لا تزعلين
لو ما عرف قدرك أحد
ولو قلبي عنك ابتعد
لا تزعلين
انتيلّي كنتي ما تبين
..
لا تزعلين
كل لحظه عشتيها معاي
كانت تضوي لي سماي
الكل درى انك غلاي
ليش انتي كنتي بترحلين
..
لا تزعلين
لو نبض قلبك لي وقف
ولو شوقك لشوفي رجف
كم قبل هالمره ضعف
وهم مثله انتي بتضعفين
..
لا تزعلين
ما اعيش الانتي معاي
ما عاش برد وانتي دفاي
مالك في هالدنيا سواي
يا ست كل العارفين
..
لا تزعلين

Wednesday, March 5, 2008

د. أحمد الربعي

عشت شهماً
ومتَ شهماً
..
كم كنت تسعدني في كل مقابلاتك
رحمة الله عليك

Saturday, March 1, 2008

سبب سعادتي



:قواعد السعادة السبع في حياتي

علمت نفسي اني ما اكره احد حتى لو غلط بحقي
احاسب نفسي كل ليله قبل لا انام
اي مشكله تواجهني اوكلها لربي .. مافي افضل من الصلاة والقرآن
ما التفت لي ورى .. عشان لا اتأخر
قليل دائم خير من كثير منقطع
ادعي لغيري قبل لا ادعي لنفسي
حبي لبيتي واولادي واخواني ووالديني وباجي الدنيا بما فيها انتو طبعا
:))