حب .. بنكهة العسل

هذي القصه اللي بقول لكم اياها الحين .. انا ذكرتها في بوست من بوستاتي السابقه .. طبعا هذا الكلام موجه للي متابعين كتاباتي !! اما اللي ما حالفهم الحظ حتى يعرفون ابطال هذي القصه .. فكل اللي عليهم انهم يرجعون للبوستات السابقه عشان يتعرفون على ابطال قصتي .. الشي اللي كلكم ما تعرفونه اهو شلون تعرف بطل هالقصه على البطله

..

يقول لكم في سنه من السنين كان فيه اثنين ربع

واحد اسمه عبدالله .. والثاني اسمه فهد

عبدالله وفهد تعرفو على بعض بالثانويه

كان جدولهم تقريبا متقارب من اول سنه درسو فيها

هذا السبب اللي خلاهم يتقربون من بعض اكثر

تدرون ايام الامتحانات كانو دايما يدرسون مع بعض

فبيت واحد منهم .. المراد انه مع السنين والايام صارو الاثنين اكثر من اخوان

يشوفون بعض بالمدرسه بشكل يومي .. وايام العطل كانو هم يطلعون مع بعض

..

في يوم من الايام كانو رايحين مطعم من المطاعم اللي على البحر

اعمارهم طبعا ما تتعدى ال17 سنه

شباب وتعرفون طلعات الشباب اللي بهالعمر

لازم يبون يرقمون ويتحرشون وما شابه

المهم انهم كانو في كل اجازة نهاية الاسبوع يترددون على نفس المطعم

والصدفه انه فيه بنيه هم بعد تتردد على نفس المطعم بس مع اهلها

..

فهد كان يتسبّه كل ما شاف هالبنيه

كل امله انه يلقى الطريقه اللي تخليه يتعرف عليها

البنت ما كانت تفارق اهلها ولا لحظه .. شكثر حاول انه يأشر لها

ابي اكلمج .. واهي كانت تكتفي انها تطالعه بس لكن بدون استجابه

عبدالله كان يلعب دور الوسيط

يعني يراقب حركتها بالوقت اللي يكون فهد قاعد ينطرها بره المطعم

وفي يوم من الايام التقى عبدالله فبنات خالته مع نسيبهم

الشي اللي ما كان بالحسبان انه بنت خالة عبدالله تعرف هالبنيه

وسلمت عليها جدامهم

عبدالله طار من الفرحه وقال حق فهد خلاص انحلت

بنفس اليوم بالليل من ارجعو .. عبدالله اتصل على بيت بنت خالته وكلمها

قال لها هذي البنيه اللي سلمتي عليها منهي

قالتله رفيجتي وياي بالمدرسه .. ليش ؟؟

قال لها شسمها ؟؟

قالت له نور .. ليش تسأل

قال بصراحه .. شوفي انا بقول لج لاني اثق فيج وادري انج ما راح تعلمين احد

رفيجي فهد وايد معجب فيها ويبي يكلم اهله عشان يخطبونها له

قالت له بس اهو من عمرك يعني للحين طالب شلون يقدر يتقدملها واهو ما يشتغل ولا عنده معاش ولا شي

قال يبه اهمه بيحجزونها .. يعني بس ربط كلام .. عشان لا تضيع منه بس

ومن يتخرج على طول راح يخطبها رسمي

..

المهم ماني مطول عليكم صار اللي صار وقدر فهد انه يحصل رقم نور وكلمها

ما عطته ويه بالبدايه لكن كثر ما لح عليها وبين لها انه معجب فيها وجد يبي يخطبها

شوي شوي بدت تكلمه .. واستمرو بهالعلاقه

طبعا كل ما تهاوشو كان اللي يتدخل بينهم عبدالله .. علشان يصلح بينهم

كان عبدالله مصدر ثقه للاثنين

يت ايام وراحت ايام وتخرجو عبدالله وفهد من الثانويه

وفهد يتله بعثه برّه الكويت .. اما عبدالله فدخل جامعة الكويت

اللي صار انه فهد بعد ما سافر بدى يتغير شوي شوي على نور وهم على عبدالله بعد

الظاهر انه لهى بالغربه وتعرف على ناس يدد او الله اعلم .. بس كلش ما قام يتصل لا على نور ولا على عبدالله

نور وعبدالله تمت اتصالاتهم فبعض بس على اوقات متفرقه

يعني يمكن كل جم شهر مره

..

نور وايد تعز عبدالله وتحترمه .. لانه ريّال ووقف معاها بأصعب المواقف اللي كانت تحتاج لاي احد انه يوقف معاها فيها

وعبدالله نفس الشي .. يعزها وما يرضى عليها ومتواصل معاها بين كل فتره وفتره

عقب نور تخرجت من الثانويه ودخلت الجامعه .. بالوقت اللي كان فيه عبدالله معاها بنفس الكليه

لكن اهو مو باقيله شي على التخرج

اهني قوة علاقتهم اكثر .. عبدالله بدى يهتم بنور بشكل مباشر .. يكلم لها الدكاتره ويوصيهم عليها

والطلبه كلهم يدرون انه نور بنت خالة عبدالله !! مع انهم ما يصيرون حق بعض

مرّت الايام والسنين وتخرج عبدالله من الجامعه ولقاله وظيفه واشتغل

اما نور بهالفتره كانو يتقدمون لها وايد ناس يخطبونها واهي تشاور عبدالله بهالموضوع

وتاخذ رايه .. وعبدالله بدوره يسأل عنهم ويتأكد من اخلاقهم وسلوكهم وهالاشياء

بس فكل مره ما يصير نصيب

..

عبدالله بعد ما توظف قامو يحنون عليه اهله لازم تتزوج .. ومتى بتتزوج ,, اووو عاد حنّة الاهل

قال لهم يالله دورولي .. وسبحان الله كل ما لقو له وحده ما تعجبه او يصير شي وتتفركش السالفه

كل اللي قلته بالبدايه يمكن مو وايد مهم عند بعضكم

المهم انها اتصالاتهم ماكانت تنقطع من فتره لي فتره واحيانا بشكل يومي واحيان بشكل اسبوعي وجذي حسب الظروف

اما عاد بالمناسبات فكانو ما ينسون ولا مناسبه

اعياد ميلادهم .. عيد الحب .. العيد الوطني .. عيد الفطر ,, الاضحى .. عيد الأم .. العمال .. راس السنه .. الخ

..

المهم تخرجت نور من الجامعه .. وهم اشتغلت بالقطاع الخاص .. وهم تمت للحين مع عبدالله

وان جان تذكرون سالفتهم بالصالحيه بــ جوني راكتس واللقاء الحاسم

انا بينت لكم شكثر عبدالله كان يهتم بنور ويحب انه يكون سبب فسعادتها وانه ما يردلها طلب واشياء

لكن اللي صار انه نور عقبها بأشهر انخطبت رسمي من واحد وتقدملها وقصو المهر وصارت الملجه

بسرعه بسرعه .. نصيبها وياها

اهني عبدالله ابتعد بعد ما تمنى لها الخير ودعا ان الله يوفقها ويسعدها مع زوجها

..

بعد اشهر من زواج نور كان يصادف عيد ميلادها

عبدالله كان قاعد بالدوانيه مع ربعه وطايحين له كوت بو سته

ويسمع منبه تليفونه يطحن

قعد يقول ليش حاط تنبيه شوراي باجر .. بدون ما يقوم

لانه تليفون كان بعيد عنه واهو لاهي باللعب

لكن يوم خلص من اللعب وشاف التليفون والا المنبه كان قاعد يذكره بتاريخ عيد ميلاد نور

ما عرف شيسوي .. هل يدزلها مسج هالحزه ؟؟ فشله !! المره متزوجه

طلع من الديوانيه وهو باله كله معاها

شلون تمر هالمناسبه بدون لا يكلمها ولا حتى يدز لها اغنيه من خدمة اهداءات الأغاني

قال ماكو الا باجر من الصبح ادز لها مسج اذا فاضيه محد يمها اكلمها واعتذر ومنها اباركلها بعيد ميلادها

وصل البيت حط راسه على المخده .. يبي ينام .. وموقادر .. قاعد يفكر فيها

قعد يتذكر سوالفها وضحكتها وبجيتها .. ما لقى نفسه الا وهو يعيد شريط المسج عشان يسمع مسجاتها ملوت اول

ومن صار الصبح .. قام ودزلها مسج .. كل عام وانتي بألف خير وسامحيني مو ناسيه عيد ميلادج

اهم شي انه مو ناسيه !! عشان اذا طاح ريلها على المسج والا ياي من بنيه :)) حركات بوعابد

..

بنفس الوقت ردت عليه واهي طايره من الوناسه

قالت له والله اني كنت قاعده انطر مسجك او اتصال

واقول في نفسي لا شكله ناسي اليوم

وما كنت ابي ادز لك مسج .. اخاف زوجتك تشك وتصير لك مشكله

قال لها: زوجتي!! ومن قال لج اني تزوجت؟؟

قالت: ذاك اليوم شفت هبه بنت خالتك بيمعة البنات واهي قالت لي لنك تزوجت!! ليش مو صج

قال لها : طبعا مو صج

قالت : غريبه!! عيل ليش قالت لي جذي

قال : مادري ..مينونه هذي

المهم ما عليج منها تجذب .. انتي شلونج .. ما في بيبي بالطريج

قالت : لا الحمدلله

قال : افا في وحده صاحيه تقول هالكلام !! تبين الله يحرمج منهم طول عمرج

قالت : لا والله مو هذا قصدي .. بس انا خلاص

قال : شنو خلاص

قالت : انفصلت

قال : حلفي

قالت : والله

قال : لا انتي يبيلج قعده .. عفيه عندج شي الظهر اقدر اشوفج

قالت : امبيه مادري .. شلون ووين اخاف احد يشوفنا

قال لها : لا تخافين .. عفيه ابي اشوفج ضروري

قالت : مادري عبّود خلني اشوف واقول لك

..

المهم انهم اتفقو على الساعه والمكان

وصل عبدالله قبل نور للمكان

وعقبها بنص ساعه تقريبا وصلت نور .. بكامل اناقتها

وبعطرها اللي يسحر حتى ذرات الهوا

اقعدو وطلبو وسولفو وعرف عبدالله شكثر انه زوج نور كان حمار

المهم انها القعده هذي غيرت وايد اشياء بداخل عبدالله

خلته يفتح عينه على شي كان غافل عنه

عقب هذي الجلسه .. عبدالله كان طاير من الفرحه .. موعارف شيسوي كل 5 دقايق يدز لها مسج والا يتصل عليها فيه حجي وايد وده يقوله ولقى الوقت المناسب .. اليوم بس حس بشي يدق داخل قلبه .. اليوم حس بمتعة الحب .. اليوم بس عرف شمعناة انك تقضي لحظات مع انسان تحبه

راح على طول السوق عشان يشتري لها هدية عيد ميلادها .. من وناسته خذى لها بدال الهديه 3 .. وراح غلفهم احلى تغليف وشرى كرت وكتب عليه كل عام وانتي بخير يا اغلى انسانه عرفتها بحياتي

..

رجع البيت وهو مو داري شيسوي بعمره .. يقول بقلبه اقول لها اني شريت لها هدية عيد ميلادها والا اسكت واسويها مفاجأه باجر مرّه وحده .. انزين اتهقى اهي حسّت اني استانست لما قالت لي الخبر .. شلون انا كنت عمي طول هالفتره اللي طافت وما شفت عيونها ولا جمالها ماشالله .. ترى صج صج حلوه .. غريبه وحده مثلها الف من يتمناها وانا غافل عنها ..

وهو قاعد يفكر بهالتفكير .. قال خل اتصل عليها واقول لها تصبحين على خير عالاقل .. قام واتصل

شالت التليفون: الو

قال: ها قوه

قالت: اهلين

قال: سوري عسى ما نمتي

قالت: نوو قاعده .. قلت شوي وبنام .. وانت ليش ما نمت؟؟

قال: مو يايني نوم

قالت: ليش .. لا يكون عاشق وانا ما ادري

قال لها: شدراج

قالت: افا .. يعني صج اللي قالت لي اياه هبه .. تخش عل اخيتك

انقلب لونه

لأ اخيتي

تنرفز

جاوبها: خل تولي هالحماره هذي ليش شقايلت لج .. لا تخليني الحين ادق عليها واهزأها جدامج

قالت: امبي شفيك عبدالله .. ليش عصبت .. قاعده اتغشمر معاك

قال: لا بس مو من حقها تتكلم عني جدام البنات وتجذب

قالت: ليش لهالدرجه هامينك البنات

قال: لا والله بس انتي تهميني .. مو انتي كنتي معاهم وسمعي كلامها

قالت: انزين ما صار شي يمكن ما تقصدني انا .. يمكن في وحده حاطه عينها عليك واهي تبي تسكر بويها الطريج

قال: انا ما يهمني احد بس لا تتكلم عني

قالت : اكيد ما يهمك احد

قال: اي والله ما يهمني احد عاد زين

قالت: ولا انا

صمت

قالت: انزين عاد خلاص ليش معصب .. بس اهدى اهدى عشاني

سكوت

قالت: الوو

رد: الو

قالت: شفيك

قال: ولا شي

قالت: خلاص عاد عبدالله .. لا تعصب .. قلت لك عشاني .. والا مالي شان عندك

قال: لا يبه من قال جذي .. خلا ص ما فيني شي

قالت: احلف

قال: والله

قالت: والله شنو

قال: والله مو زعلان

قالت: انزين خلاص خل نغير السالفه

قال: يكون احسن بعد

قالت: بذكرك بشي .. شرايك

قال: شنو

قالت: تذكر قبل لما كنا نلعب صراحه

قال: اي اذكر

قالت: شرايك الحين نلعب .. نغير جو شويه

يبيها من الله

قال: يالله

قالت: انا اسأل أول

قال: اوكي يالله سألي

قالت: بس شرط تجاوبني بصراحه

قال: والله راح اجاوبج على كل اسألتج .. وبصراحه

قالت: اوكي..قولي .. انت تكلّم الحين؟؟

قال: والله لأ

قالت: اكيد؟؟

قال: والله لأ قلت لج

قالت: اوكي مصدقتك .. يالله دورك .. اسأل

قال: عادي اسأل بأي شي أبي صح

قالت: اي

قال: صار شي بينج وبين هذا الحمار

قالت: شنو يعني .. شتقصد صار شي

قال: يعني اهو كان زوجج .. عاد فهمي ما اقدر اوضح اكثر من جذي

قالت: شوف .. ماصار اللي فبالك .. احنا صج تزوجنا بس ما صار عرس .. وانا كنت محافظه على نفسي .. وحاطه فبالي اني مابي شي يصير الا بعد العرس .. والحمدلله ماصار شي

قال: يعني كلش اهو ما حاول .. مع انه خلاص يعتبر ريلج

قالت: شوف اهو حاول بس والله ما صار شي غير الاشياء الاعتياديه

قال بعصبيه: انزين خلاص غيري السالفه

قالت: شفيك .. دوري اسأل

قال: سألي

قالت: لو كان صاير شي .. شراح تكون ردة فعلك؟؟

قال: انا شعلي .. مو ريلج

يعني لو انا مكانج شراح تسوين ؟؟

قالت : اذبحك انت ويّاها

قال: ليش مو زوجتي حلالي

قالت: حللّو دمكم انت وياها قول امين

اهني اهو رجعت له الثقه مره ثانيه

قال: اسألج سؤال؟

قالت بعصبيه: شنو

قال: شصار فيج يوم سمعتي خبر زواجي

قالت: بصراحه .. تضايقت وايد .. مادري افرح لك والا اتضايق عشانك .. اختلطت مشاعري

قال: شلون

قالت: حسيت انك خلاص بعد ما راح تكلمني .. او مو جذي بس .. قصدي اووه مادري تضايقت وبس

قال: شفيج كملي

قالت: بس خلاص

قال: نور شفيج

قالت: ولا شي .. خلاص عبدالله

قال: نور اقدر اشوفج باجر

قالت: اليوم شايفني.. حلاو .. كل يوم

قال: عندي لج شي

قالت: شنو

قال: باجر تعرفين

قالت: لا صج شنو

قال: والله باجر راح تشوفينها بعينج

قالت: مادري احاول

قال: لا تستعبطين نور .. يا اي .. يا لأ

قالت: انزين مادري لي باجر يصير خير

قال بعصبيه: خلاص يبه كيفج

قالت: اوكي خلاص .. تصبح على خير

قال: وانتي من اهله .. مع السلامه

وسكر الخط على طول بدون ما يسمع منها رد

رجعت دقت عليه

قالت له: ليش تسكر التليفون بويهي

قال: ما سكرته بويهج .. قلت باي

قالت: بس انا ما رديت عليك

قال: مادري .. علبالي قلتي باي

قالت: لااا عبدالله

قال: شنو

قالت: اوكي مشكور .. مع السلامه

قال: انتي شفيج .. بخاطرج تتهاوشين

قالت: انا والا انت .. ما شفت طريقتك شلون متغيره معاي .. والا من متى انت تسكره بويهي هاا

قال: انتي نرفزتيني

قالت: شقلت .. كل هذا عشان قلت لك ما ادري احاول .. ليش احاول فيها شي .. غلطت عليك

قال: لا بس قاعده تحسسيني جني قاعد اطر منج الشوفه .. عمرج ما كنت جذي

قالت: قبل كنت بنت .. الحين اهلي غير وايد متشددين علي .. كل شي بحساب

كلام الناس وكلام الناس .. وانا بعيون الناس منفصله .. فهمت الحين

قال: ادري والله ادري بس لو انتي متكلمه معاي بهالطريقه جان ما صار كل هذا

(خنقتها العبره وبجت)

قال: نور

صمت

قال: نور

قالت: نعم

قال: خلاص انا آسف

نور .. حبيبتي .. بس عمري عشاني لا تزعلين

نور .. نور .. عمري .. عمري ردي علي عاد

قالت: هلا .. ماني زعلانه .. عادي

قال: تدرين لو انتي عندي الحين جان شسويت فيج

قالت: شنو ؟؟

قال: جان مسحت دموعج بأيدي .. وحبيت راسج .. ولميتج حييييييل

نور

قالت بذهول من اللي سمعته: هلا عمــــري

قال: تهقين اقدر اصارحج بشي الحين

قالت والدموع للحين ماليه عيونها: بشنو

قال: لما اشوفج باجر الصبح اقول لج اوكي

قالت: اوكي عمري

قال: خلاص الحين اخليج تنامين حياتي وباجر من تقومين كلميني اوكي

قالت: اوكي عمري تصبح على خير

قال: وانتي من اهل الخير

..

نامو الاثنين وقلوبهم قاعده تأدي قسم الحب لبعض

وصار الوقت الموعود

عبدالله صارح نور بحبه لها

وعطاها هدايا عيد ميلادها

وطلب ايدها للزواج