في صدري رجلٌ آخر

اصدقائي المدونيين والقراء الحلوين و القراب من قلبي

اليوم محد يقدر ينكر مدى التجانس والالفه اللي تجمعني فيكم

طول فترة تدويني وانا متبع نهج التلقائيه والشفافيه والبساطه

حتى اقدر اني اوصل لقلوبكم من غير اي تكلف

ولأن كل واحد فيكم له قدر خاص عندي

شكرا لاهتمامكم فيني واهتمامكم بهالمدونه وبمواضيعي وتجاوبكم معاي

اقول لكل من بعث لي ايميل يسأل فيه عن اخباري

بأني لله الحمد بخير وصحه وعافيه

نعم ابتعدت الفتره الاخيره بسبب الظروف اللي مريت فيها

كانت جدا قاسيه ومؤلمه

تلقيت اكثر من خبر سيء بأقل من اسبوع

منهم فقدان لناس اعزاء علي وعلى عائلتي

ولكن الحمدلله على كل حال

الحين وانا قاعد اكتب لكم ماشالله رشّت علينا خوش مطره وابردي

خير

يا رب تنالون اكثر من ما تتمنون

حبايبي

بدش بالموضوع

..

في صدري رجل آخر

العنوان يعطي اكثر من معنى مثل ما تلاحظون

والصوره يمكن تقرب المعنى ويمكن تبعده حسب تفسيركم لها

اللي اقصده اهو شي صار لازم نهتم فيه

خلونا نتفق انه الكل له عيوب ومميزات

تختلف من شخص لي آخر

بعضنا يهتم بالجزء الملائكي اللي بداخله

والبعض الآخر للاسف يتباهى بالجزء الشيطاني

على كل حال

اغلبكم ملاحظ مدى اهتمامي بالعلاقات الاجتماعيه والانسانيه

وتركيزي على الحب والصداقه والاستقرار الاسري

..

اكثر شي شدني وخلاني اكتب هالموضوع

ملاحظتي لكثير من الازواج بينهم شي سميته جفاء عاطفي

في مشكله عند بعض الرجال بالتعبير عن عواطفه

فما بالك المبالغه فيها

الشي اللي تتمناه المرأه

!!

الشعور بالغير اهم من المال

ممكن توفر لزوجتك كل احتياجاتها الماديه

من لبس واكل واكسسوارات وبيت ومصرف

لكن تقدر توفر لها اطمئنان عاطفي .. اهتمام .. حب ؟؟

..

شاللي يخلي الزوجه تبحث عن من يوفر لها الاهتمام غيرك أو حتى الحب والجنس

!!

بعض الازواج حط نفسه في زاويه ضيجه

يبحث عن المال عشان اسرته

يحمل نفسه فوق طاقته عشان يوفر لهم الفلوس

يدخل عياله اغلى المدارس ويلبسهم احلى الملابس

ولكن هذا كله مادي مادي مادي

الماده تخلص

والعاطفه اهي اللي تبقى

دوروا على اللي يترك اثر في قلوب الناس القريبه منكم

المغريات كثيره

وبيتكم اولى فيكم

..

وايد زوجات اليوم عندهم اصدقاء اوفياء اكثر من الازواج

يسمعون لهم

يقاسمونهم الفرح والالم والمشاعر

هذا الشي يخلي الزوجه تتأمل بغير زوجها

وتتمنى لو يحمل زوجها ربع اللي يحمله هذا الغريب

!!

لما ما تلاقي من يهون عليها مشاكل العمل

ولما ترجع للبيت وتواجه مسئوليه اليهال والخدم والتدريس وروحة الجمعيه

وتلبية الاحتياجات والنواقص والتوجيب وغيره

لين يهلك كل شي بداخلها

تقوم تحط راسها عالمخده وتفكر في باجر ومشاكل باجر

وتقول بقلبها .. يا رب ليش كل هذا قاعد يصير فيني

والله تعبت وتنزل دموعها على مخدتها

بهالوقت يرجع الزوج من بره

متعطر بنكهة الارجيله وشبعان ضحك مع الاصدقاء ويمكن بعض الصديقات

ويتذكر انه في جسد مره نايمه بنص هدومها بالسرير

يقوم يمد ايده عشان ينزع عنها النص الثاني

ويمارس رجولته

ويخلص

وينام

..

صديقي

غدا ستشاركني همومي

..

زوجي

في صدري رجلٌ آخر

إهداء