ابتعد .. أو ارحل

قرار مفاجأ

ادري بعضكم بيزعل مني

بس

يايني شعور الحين الغي المدونه باللي فيها

ولا تسألوني ليش

!!

خارج الموضوع

هذي الأغنيه اللي اشغلها دايما بالسياره هالأيام

اهداء

..

شكرا لكم كلكم

شكرا لوجودكم معاي طول فترة تدويني

..

بس اكره لحظات الوداع

يالله روحوا

آنا معـــاج

شكثر الانسان يحس بالأمان لما يلقى احد معاه

..

اصعب شعور بالكون اهو الشعور بالغربه والوحده

..

لما الله سبحانه خلق امنا حواء

كان السبب انها تسكن وحشة ابونا ادم

..

تييني اوقات اقعد اتخيل اشياء تصير واشياء ما تصير

اشياء تضحك واشياء تحسسني بالغباء

خصوصا لما افكر بأسماء معينه واقعد اتأمل فيها

واقول يا رب منو عندي بهالاسم

على سبيل المثال

عندي ولد خال اسمه مشعل

قعدت افكر بأسمه بدون لا اربط انه هذا اهو اسم ولد خالي

وبعدين تذكرت انه مشعل ولد خالي

ايييييييييييييييي

بس اكتشفت انه اسمه ما يركب على ويهه

:))

..

مو هذي سالفتي

السالفه اللي بقولها

تخص اثنين

اجبرتهم الحياه انهم يلعبون نفس اللعبه اللي العبوها اغلب اللي حبوا

..

وايد ناس صارت عندهم قناعه بأنه ما عاد في حب بزمنا هذا

عمرها هالقناعه ما اثرت فيني !! لأني جربت اني احب

ولاني عرفت طعم الحب

ولانه هالشي يعطيني دافع اني اعيش اكثر

وارضى اكثر

واضحك اكثر

واحس باللي حولي اكثر

..

تتصورون اللي قبلنا راضين عن حبنا

واللي قبل قبلنا راضين عن حب اللي بعدهم

كل جيل يختلف عن اللي قبله

لكن في قاعده ما تتغير

هذي رساله تنتقل من جيل المحبين القدامى للورثه الصغار

اهو ورث

يتقسم على الناس

منهم من يستثمره ويزيده والله يبارك له فيه

ومنهم من يبعثره على اشياء مالها قيمه ولا اساس

ويتفاجأ انه رصيده بالحب لا يكفيه لاتمام هذه المكالمه

..

شايب وعيوز

كانو يحبون بعض واهما شباب

بس ما صار نصيب بينهم

الشايب يسولف لأحفاده

عن حبيبته قبل

يقول كنت لي مريت صوب بيتهم

يجيني نسناس وطيب وبخور يعل كني مار عالجنّه وانا ابوكم

يسألونه الاحفاد : انزين يدي شلون راحت من ايدك

يرد بألم : يا بوكم حنّا مسيرين ما حنّا مخيرين

الاحفاد : شلون

الجد : فيكم احد اختار اسمه والاجنسه والا لونه والا اليوم اللي انولد فيه والا اليوم اللي بيموت فيه والا الزمن اللي بيعيش فيه

يبه كلنا مسيرين

واللي مكتوب ع الجبين لازم تشوفه العين

..

يكمل الجد حديثه : في ذاك الوقت ما كنت جاهز للزواج .. ما عندي فلوس كافيه .. وتوني قاعد اقول يا معين

شافوها ناس من هالجخ واخطبوها لولدهم

الأحفاد : وعقب يدي شصار فيك لما سمعت بالخبر

الجد : ايييييييييه .. يبه مرضت مرض ما تتمنونه لعدوكم .. اذكر والله اني بيوم عرسها واقف من بعيد جنب بيتهم ودموعي تصب دم .. من حرقة قلبي

يا بوكم صعبه على الريال يشوف حبيبته بحضن رجّال غريب ولو انه هو زوجها بشرع الله

تتكشفله عن محارمها وتبات معاه بدار وحده وبسرير واحد

(الله يلعن ذاك اليوم .. ويلعنكم على هالسالفه حرقتوا قلبي يالله ذلفوا (وهو يضحك

الاحفاد يبون يكملون السالفه : انزين يبا واهي شلون عاشت بدونك

الجد : طاحت لها بخاله قشره ورّتها نجوم الليل بعز الظهر .. لا وكانو خوات الحمار زوجها يتعاونون عليها ويظلمونها ويسبونها بويهه ومن ظهرها .. ويبرون كل الكناين الا هي يذمّونها

الاحفاد : وشجابرها على هالعيشه .. ليش ما تطلقت منه

الجد : وين تروح .. مالها احد وانا ابوكم .. ما غير الرجّال ابوها وعطاكم عمره .. ما بقى لها احد

الأحفاد : وانت يدي

الجد : انا .. انا معاها بقلبي وعقلي وروحي .. لين اموت

..

يمكن بيوم من الايام راح اقول سالفه مشابهه للأحفاد

..

واكيد

دايما راح اكون معاج

اهداء قابل للتغيير ؟؟

يا قلب ابوك

ابني الغالي عبدالمحسن

يعز علي ان افارق نبضات قلبك الأبيض الجميل

منذ ثلاث شهور وانا امني نفسي بك

لتكون ابنا جميلا كجمال اخوتك

عبدالله ولين

لقد كنت اقترب يوميا من احشاء امك لالقي عليك التحيه

هل كنت تسمعني .. بابا

..

هل ازعجتك دعابتي مع اخوتك الدائمه

هل تعلم كم اني تعلقت بك

هل سمعتني وامك كيف كنا نخطط بأي مشفى ستولد

وبأي غرفه سنستقبل المهنئين

هل رأيت جنوني يوم الجمعه الفائت في برّوي

كيف كنت ابحث لك عن سرير لتنام به نوما هنيئا بالنهار

لانني على علم بأنك ستواصل البكاء طوال الليل لتزعجني

هذا ليس بغريب

فأخوتك سبقوك وفعلوها

..

ابني العزيز

لقد قالت لي امك بأن نبضات قلبك قد سكنت

ابني عبدالمحسن

يا قلب ابوك

يا ريت وقف قلبي ولاني اسمع هالخبر

ليش بابا

..

استعيلت الجنه

..

سامحني يارب

سامحني ان اسأت التعبير

..

احمدك على كل النعم التي انعمت بها علي

..

ولي رجاء اخير منك يا ربي ويا حبيبي ويا خالقي

ان تجمعني مع ابني عبدالمحسن في جنتك

..

لا حول ولا قوة الا بالله

السهره

لما تغفى عيون البشر وتبقى عيونكم تطالع السما

يسمون هاللحظه لحظة سهر

السهر

له وقت واحد

اخر المسا

لين يشق النور

مافي احد منه ما سهر

.....

بس سهر عن سهر يختلف

في شخص يسهره التعب

وشخص يسهره الفرح

.....

في احدى المناسبات الاجتماعيه

في منزل احد الدبلوماسيين

تيمعو فيها مجموعه من الناس

كان الكل حاضر بكامل اناقته

والسيارات الفخمه ماليه الشارع من اوله لي اخره

اما عن حديقة الفيلا

فكانت متروسه اوادم

ناس قاعده على الطاولات تسولف

وناس ترقص بالنص

هذا يسلم على مرت هذا

وهذيك تبوس زوج هذي

والمشاريب تتوزع على الكل

بكل الانواع طبعا

اشي فودكا واشي شيفاز واشي ريد ليبل واشي بلاك ليبل

واللي يبي يعلّي مزاجه ياخذله شوت تكيلا مع الملح والليمون

:)

ناس عايشه

..

فيصل

ولد خريج علوم سياسيه حالفه الحظ والنسب الرفيع

ان ينخرط بالسلك الدبلوماسي

وغيره تخرجوا بمعدلات اعلى منه اشتغلوا بوزارة الصحه

مو هذي السالفه

كان عنده صديق اسمه مؤيد

مؤيد هذا كان يزور فيصل باجازة الصيف

يحليله مستانس انه عنده رفيج يشتغل بالسفاره باحد الدول الاوروبيه

تعود كل ما يطب هالديره سيارة السفاره تنطره عند المطار وتاخذه للفندق

مساكين موظفين الحكومه

..

المهم انه بهالرحله هذي صار شي ما تحققه حتى الاحلام نفسها

!!

فيصل قال لمؤيد: اليوم ابيك تلبس لبس رسمي .. يعني بدله كامله ببالطوها و ببنطرونها وبكارفتتها

عازمك على حفله خاصه شويه مسوينها

وفيها ناس راقيه ودبلوماسيين اوكي

!!

قام مؤيد ولبس بدلته الارماني وتطيب وحط الواكس على شعره

وراح

..

فيصل كان يمشي بين الحضور ويعرفهم على صديقه مؤيد

ومؤيد كان عباره عن شخص لا يجيد الا الابتسامه بويووه الاوادم والمصافحه

ليما وصلو عند مجموعه واقفين يم حمام السباحه

وبدى يعرفهم على مؤيد

من بين الواقفين كان واحد ملامحه مو غريبه على مؤيد

شخص حطم حياة مؤيد

شخص انهى احلى اللحظات اللي كان مؤيد عايشها

الصعقه الاكبر كانت يم هذا الشخص

غدير .. حبيبته

بدون حجاب

!!

اوف .. لأ .. ليش غدير

انتي اطهر انسانه عرفتها بحياتي

انقطع الصوت عن مؤيد وغدير

تمّو يطالعون بعض بذهول

وقلوبهم تدق بسرعه ما قد صارت لهم من قبل

..

الناس قامت تتكلم

شفيهم

وحده من المتيمعين تقول للثانيه

هذا كان حبيبها قبل بس اهلها ما رضوا فيه

شوفي الصدفه التقوا اهني

..

مؤيد كان بداخله الف علامة استفهام

تذكر شكثر كان يخاف على شرفها

وشلون فرح لما قالت له اني بتحجب

تذكر اول مره شافها بالحجاب

تذكر شلون كان يدقق على ملابسها انها ما تكون ضيجه

تذكر شكثر كان يقثها اذا التقى فيها بمكان بره بالمسجات

دخلي قذلتج

خشي رقبتج

ليش

..

وبداخل عين غدير كانت الاجابه

اهو يبي جذي

زوجها ولد الحسب والنسب

يبيها عاريه عشان يتشيحط فيها جدام الاوادم

يبي الذيابه تنهش بلحمها عشان يقولون عنه ريال عصري

ومتفتح واوبن مايندد

..

حسافه عليج يا غدير

..

سامحوني ما راح اقدر اكمل القصه

بس ذهلت من جرأة البنات واستخفافهم بالحجاب

لي درجة انه قطة الحجاب صارت صرعه غريبه

وبدت تنتشر بشكل رهيب

خصوصا لما شفت ناس

ما كنت بحياتي اتوقع انهم يسوونها

..

اهداء

صحوة ضمير

كل ليله قبل لغفى واتوسّد هالوساده
ابدي استغفر وادعي ربي يعطيني السكينه
ماهي من مده ولكن صارت اليوم عندي عاده
ان احاسب دوم نفسي وابتعد عن كل ضغينه

..

اكتشفت ان اللي يعمل خير يشعر بالسعاده
واللي يعمل شر لازم باجر الدنيا تدينه
الكريم توضح صفاته لوهو جاهل وبمهاده
واللئيم يرد لاصله لاهو منّا ولاهو فينا

..

ادري في اشياء صعبه منّا محتاجه لاراده
لو بعدنا حيل عنها تبتدي اهيا تجينا
الحسد للقلب شر ومايزيد الا سواده
واللي مافي قلبه رحمه باجر الدنيا تهينه

..

يا حبايب قلبي قوموا لين داع الله ناده
والله مافي كرب يبقى دامنا نرفع ايدينا
لو نجمّع كل كنوز الكون وسجده ع السياده
كنّا نسجد ما تبقى من عمرنا ومكتفينا

..

ديننا دين السماحه والصلاة اهيا عماده
وان عصف بالموج ريحٍ لازم تسير السفينه
سني شيعي .. شيعي سني ما تفيد الا العباده
واللي بيته بوسط مكه واللي قبره بالمدينه

..

يا جموع الناس هونوا مالكم الا الركاده
كثر ما حنّا نتفارق كثر ما حنّا شقينا
مره لو بس انتوحد .. ينهي كل منّا عناده
والله كنّا ندوس دوس برجلنا من سب نبينا

..

مشكله من حب نفسه .. ياخي حبتْه القراده
ما بتبقى له كرامه اللي باع اليوم دينه
هالكلام الي انا قلته ... غير قابل للاعاده
واللي ما يصحى ضميره باجر الدنيا تهينه

..


مناف نذر

اشتقت احبك

اشتقت احبك يا غلاي

واشتقت لايام الغرام

كنتي في كل لحظه معاي

اسمع تناهيدك وانام

..

الله على ذاك الزمن

كانت عيوني تعجبك

وجودي له حولك ثمن

وان ملت صوبك ترتبك

..

ما قلت لك

ان الحياة بتستمر

وبيظل يمضي هالعمر

واللي انتمنى نوصله

يا حبي محتاج لصبر

..

اهداء حصري

انتي السبب

ما قلت حبيني غصب

ولاني أوّل من يحب

لكن في قلبي شي واحد

ماني لاقيله سبب

..

من اللي شاغبني عليه

من اللي اسقاني التعب

من اللي راسم صورتك

مابين عيني والهدب

..

منهو السبب؟؟

منهو ابتدى فينا الغضب

من اللي ع الثاني كذب

انتي

انا

منهو السبب

..

ليه بس .. ضايقتك بشي ؟؟

ليه تذبحي ذاك المحب

لو اختصرتيها علي

ماكان احد منّا تعب

..

كم مرةٍ منك زعلت

وبعدها طاح الحطب

وشصار لو مره غلطت

دام اني ما سئت الأدب

..

لكن حسافة كل شي

جفّت عناقيد العنب

اغليتي ياعمري التراب

وما اكتفيتي بالذهب

..

الحين بس اقدر اقول

انتي بـ درب وانا بـ درب

مو وحدي بس اللي خسرت

كلنا ترى

وانتي السبب

..

song 4 u .. wish u like it

BO HAYLAN

للنجاح طعم لذيذ

في هذ البوست حبيت انكم تشاركوني نجاحي

ادري في كثير منكم ناطرني انزّل بوستات حب ورومانسيات

وعد بأذن الله ورى رمضان بتلاقون كل اللي يسركم

لا تحاتون

..

حبيت بس اوضّح شغله مهمه للي يراسلوني على ايميلي

والله مو متجاهل ايميلاتكم

بس انا من مده مو فاتح ايميلاتي

ووربي واصلين 4 الاف وشي بدون مبالغه

:))

لكم مني بس افضى ارد على واحد واحد

وشكرا على المتابعه والسؤال والملاحظات

..

بعد بقى شي مهم بخاطري اقوله

انا لما اكتب شي

اكتبه بكل عفويه وطيب نيه

لا اعادي احد ولا اضمر الكره لاحد

ولأني ماني ملاك

قد اسيء التعبير من خلال الردود على البعض

..

التدوين شي جميل

والاجمل اهو تفاعل الناس وقراءاتها لمواضيعنا

حتى للي ما يتوالموون معانا

لو بنكتب لنفسنا

جان اختصرنا الوقت والجهد

وشرينا دفاتر وكتبنا لروحنا

!!

..

المهم

ورى العيد لي معاكم موعد

..

تقبّل الله طاعتكم

غبقات

بصراحه من العوايد الحلوه اللي الله لا يحرمنا منها

الغبقات الرمضانيه

..

ما حضرت الا 3 غبقات

الأولى

غبقة وزير الأعلام

كانت حلوه خفيفه وظريفه ولطيفه

:)

واللي لاحظته بهالغبقه

.........

اللهم اني صائم

..

الغبقه الثانيه

غبقة / أحمد الفهد

يفترض ان هالغبقه للاعلاميين

!!

الحضور كان من

......

اللهم اني صائم

مليون ريّال وبنتين

daaaahh

..

الغبقه الثالثه

للقديره / سعاد عبدالله

جدا راقيه

والحضور احلى وامتع وانطع من الغبقتين اللي فاتو

يمكن عشان ب لينوتر

:))

قدرت اييب لكم هالصوره من صديقي الصحفي خالد السويدان

السؤال

شنو ماركة ساعة ام طلال

وجم سعرها

وتعيشون

daaaaaahh

القيمات (",)

البوست حده خفيف ولطيف وظريف

اللهم لك الحمد والمنه

هذا الشهر مر كالبرق

الله يتقبل منا ومنكم صالح الأعمال

واللي للحين ما استفاد من الشهر

نصيحه يتلاحق عمره بالعشر الأواخر

..

أولا

كالعاده في رمضان تهل الأعمال علي ولله الحمد

مسرحية اطفال اسمها أبطال الفريج

بس حسافه ما راح اقدر ادعي عيالكم لها

لأنها راح تكون في دولة قطر الشقيقه

:)

..

ثانيا

للقدساويه فقط

ابارك لهم بالفوز

عجب يا عجب

مو لأنه صديقي

بس هذا اللاعب

ويهه خير على النادي وعلى المنتخب

الله يقومه بالسلامه يا رب

ويرجع ويفرحنا

عموما اهو حاليا متواجد مع الأصفر في اليابان

..

ثالثا

لمتابعين المسلسلات الرمضانيه

فضه قلبها أبيض

الكل مستاء من عادل

:)

وعادل مستانس من الاستياء

لانه اجاد الدور المطلوب منه باتقان

خالد كل يوم معاي تقريبا ودايما نتكلم عن العمل ولوين بتودينا ام الطلال المبدعه في عملها المتميز هذا

انا شخصيا اتوقع لها جائزة افضل ممثله في مهرجان الشهيد فهد الأحمد للأعمال الرمضانيه

اتيني اتصالات يوميه يسألوني عن الاحداث القادمه للمسلسل

وتعليقات لخالد

واوصلها له .. وانتو بعد اذا بخاطركم شي قولولي اياه وانشالله

بوصله له

الطريف اني كنت اتصفح احدى المدونات وكان خالد يمي

ف قرينا احد الزميلات منزله موضوع عن المسلسل

لكن باسلوب راقي

عدا احد الكومنتات واللي ما تتحملها الزميله لانها تخص صاحبة الكومنت

مش صاحبة المدونه

:)

..

رابعا

لمتابعين مسلسل الدايه

يوميا اتيني اتصالات

ناس تكلمني عن عملي

يوميات بوهيلان

اللي يثني واللي يقدم ملاحظاته

ولأني ادري من الصعوبه ارضاء كل المستمعين

لكن كان اجتهاد وبجد فرحان لاستاجبة الجمهور سوا من المكالمات اللي اتييني شخصيا او تفاعل المستمعين وتوصيل رايهم لادارة المرينا والمتابعين من خلال موقعنا بالفيس بوك

وهم يمكن يوميا استقبل اكثر من عشر مكالمات يسألوني

عفيه

منو اللي اغتصب موزه

:)

وراس امي ما ادري

راح تعرفون بالحلقات اليايه

وعلى فكره

ام سوزان - حياة الفهد - ماتعطي للممثلين الا حواراتهم

خصوصا بالحلقات الاخيره

فمحّد يعرف السيناريو الا اهي والمخرج

بس اهو واحد من ثلاثه

اما اللي على ايدي

اليسار

.

.

.

او اللي على ايدي اليسار بعد

:)

.

.

.

.

او بن هندي

بس ما عندي صوره معاه

:)

..

ًواخيراً وليس اخرا

الزميله العزيزه مجرد انثى

ليش يايتني بالمنام امس

يايه تخرعيني

:)

الله يشهد ان سلامك لي امس بالحلم

كان سبب سعادتي

وقعدت من النوم وكان اكبر همي اني اردلج اياه

سوا بمسج او ايميل او باي طريقه

لكن ترددت

فقلت افضل طريقه اهي

اني اوصل لج اياها في مدونتي

ويا بخت من قدر وسامح

افضالج علي كثيره خصوصا على مستوى التدوين

وماني ناسيها

اللي ابيه منج بس مجرد ما تقرين هالبوست

روحي وشغلي الاشرطه اللي عندج

ومتأكد انج راح تبتسمين

وسويلي منهم نسخه واللي يعافيج

:)

للمواصله رقمي نفس ما اهو بس زادو عليه رقم 6

تحياتي لج