الجو يبيله انت

في العلاقات اجمالا لازم يكون في فترات تمر فيها الناس بفتور

في هذي اللحظه لازم نحاول ان نختبر مشاعرنا

لما نوصل لي هالمرحله يتوجب ان نعيد استنشاق مشاعرنا

لا باس ان نبعد شويه

نعطي روحنا فرصه على الاقل نفكر

نشتاق

نوله

نحس بقيمة حبنا

احنا ملوليين .. ودنا بكل شي .. وبس يتوفر بسرعه نزهق

..

وايد اسر نلاقي فيها الزوجه تروح بيت اهلها تبات بالاجازه

او تروح الشاليه على سبيل المثال

..

هذا ينطبق على كل العلاقات تقريبا

حتى لو ما كانو ازواج

..

الوله ما له وقت

ياما علاقات انتهت ودارت عليها سنين

بلحظه ومن بعد كل هذا الوقت نلاقي نفسنا ولهنا

الحلو بالموضوع

احيانا من كثر ما العقل له القدره على حفظ الذكريات

نلاقي نفسنا نتذكر حتى ارقام اللي نحبهم

واذا مو حافظين الرقم تلاقونه حافظين ترتيب الرقم تقريبا

ايي وقت ونتصل

حتى لو واحنا مسافرين ساعات

نتصل من ارقام دوليه بس عشان نسمع على الاقل الصوت

شياطين اللي قاعدين يبتسمون الحين

:)

..

وايد ناس مرو بتجارب حب وانتهت

اللي يضحك انه لما يلتقون بعد فتره .. يصيرون مو متاكدين انهم صج حبو بعض والا لأ

ويتعاملون مع بعض على اساس اخوه او صداقه

..

بعد مده

وبلحظه جميله

كانت تمشي فيها على يال البحر

قدر الهوا انه يلمس ذكرياتها

وينقل لها عطري

عطري اللي تحبه

خلاها تمسك بيدها الموبايل

وتتصل

عشان تقول لي

اقول لك شي

كل شي فيك احبه

حتى غيابك

دايما اتذكرك

صرت اشوف ملامحك بكل مكان

انا الحين قاعده اتمشى بروحي عاليال

الجو خيال

يبيله انت

ا

بتروحين

عشاني يا بعد روحي

اذا لي شان في قلبك

لا تروحين يا عمري

ابقي شوي .. وربك

..

انا ما اعيش من غيرك

انا ما اشوف من بعدك

عساها تنعمي عيني

اذا قصرت في حبك

..

لحظه تأمليني شوي

ضمي صدري لصدرك

ابتعطر من انفاسك

ابي اسمع انا احبك

..

خلاص الحين ودعيني

بس اهتمي بنفسك

بتم كل عمري اترياك

ردَي .. وقت ما ودَك

..

بتروحين

مابي قلبك

مابي قلبك

كل ما فكرت ابعد

ردني حبك

القى روحي

حيل اذوب

وودي قربك

ليت فيه

مثلك شبيه

ويملي دربك

..

ما أهمك

عادي يعني

تنسى منهو

كان حلمك

لين تشكي البرد

جا كلَه وضمَك

عادي روح

عندي الجروح

ولاكون يمَك

مناف نذر

آخر ليله .. حب

مافي فايده

دايما نرتكب اغلاط نتحسف عليها طول عمرنا

احيانا اطباعنا تخسرنا اغلى الناس

ما نتوقع ان ردت فعلهم بتكون يوم من الايام عكسيه

لي متى بيتحملون ويدوسون على قلوبهم عشان شي اسمه زفت الحب

..

من يتصور انه ممكن لاجمل قصة حب صادقه بالكون تتحول لجحيم

هذيك الانسانه اللي حبيتها بكل ما عطاني ربي من مشاعر واحساس

ممكن تضيعني وتخليني بطريج ماكان فيه الا انا واهي

..

كنا راضين بالمشي على الارض

ليش ولد الملك اختار نفس طريجنا

واذا كانت صدفه وغايته الصيد وهو فوق اغلى خيوله

وكلابه دار مداره

ليش تبدلت غايته لما شافج

..

قولي الصج ..العطر اللي كنتي راشته صج عشاني

مو قلت لج لا نطلع صوت

..

ليش الناس عينها ضيجه

ما يكتفون باللي عندهم

اللقمه بيده وعينه على اللي بايد غيره

..

ما حلتلك الا حبيبتي

..

انت ما تدري شاللي خلانا نمشي بهالمكان بروحنا

ما تدري شنو معنى انك تمشي وايدك بيد حبيبتك

ما تعرف شعوري لما تكون محتميه ورا ظهري

انا الامان بحياتها .. حاولت كثر ما قدرت اني اغمض عيونها عن اي انسان ممكن عينه تطيح بعينها

..

اااخ لو تدري شلون ينكسر الريَال

..

وين بتروح

الدنيا سلف ودين

باجر تعرف قيمة كلامي

..

حبيبتي

عشت معاج احلى لحظات حياتي

كنت اتمنى لو اني مت قبل لا اتخيل انج تروحين من ايدي بدون لا اقدر حتى اصرخ

تدرين اني كنت واقف عند قصر الملك وقت اعلانه خطبته عليج

تدرين انه قلبي كان يتقطع الف مره وانا اسمع يبَاب الحضور وتصفيقهم

حسافه

الحراس امنعوني ادخل القصر عشان تشوفج عيوني اخر مره

كانت اخر ليله .. حب

كانت اخر ليله .. حب

يمكن تعجبك

شوفو منو رجع للتدوين

:*

..

الله مناف رد يكتب مره ثانيه

يا حلوه ولهنا عليه وعلى كتاباته والله

..

قاعد اكتب اللي بقلوبكم

ومن متى ما احس فيكم انا

..

ابشركم اخذت دورات وايده بهالفتره

عن البرمجه العصبيه والعقليه واللغويه

اللي يبيني احاضر له من عيوني

الدوره مجانا .. قيمتها شوفتكم يالغاليين

..

عموما قاعد اعيش احلى ايام حياتي

ودار مداري ناس احبهم من قلبي ويحبوني اقوى ما عندهم

الحمدلله

..

كل شي بوقته حلو

وايد نسمع هالجمله

نعيش حياتنا كلها بس عشان ننطر هاللحظه الحلوه اللي تيي وتغير حياتنا

في ناس منا تنطر رزق وناس تنطر فرج من الله وناس تنطر حب يملون حياتهم فيه

مهم ان يكون بداخلنا امل نعيش عشانه

نداريه بقلوبنا

ونثق بانه راح ايي يوم من الايام ويتحقق هالامل

احيانا تصير لنا اشياء قويه بحياتنا لي درجة انه نقول معقوله هالشي صار لنا

مواقف حلوه .. او نتعرف على ناس ما كنا نتخيل انه ممكن انه نتعرف عليهم

نترقى بسرعه .. تنفتح ابواب الفرج ما ندري شلون

اي .. من حقنا نعيش هاللحظات

محَد احسن من احد

كل انسان بالكون له حق انه يفرح .. وتتسخرله الدنيا عشان تلبي له امنيه يعجز عن تحقيقها بروحه

..

حـــب

في ناس ترفض فكرة انها تحب او تدخل بعلاقة حب

احيانا من الصدمات اللي تعرضو لها

او انهم ما التقو بحياتهم في اشخاص تستاهل انهم يحبونهم

..

قبل نسمع عن اصدقاء السوء

:)

كله اهلنا يمنعوننا نماشيهم

ما يدرون ان اصدقاء السوء اونس من الاهل واحلى من العسل

صارت دارجه الحين فكرة صداقة الجنسين

الكل تقريبا عنده زملاء او اصدقاء سبيشل من ناس غير جنسهم

هذول الناس يحبونه ويفهمونه ويحسون فينا اكثر من اي شخص من معارفنا

..

وحده من صديقات السوء مو راضيه تخلي صديقها اللي تحبه مثل اخوها واكثر بحاله

مو عاجبها حاله انه ولد زقرتي وكشيخ ومملوح بس ما عنده حبيبه بحياته

تحاول بكل ما عطاها الله من قوه تختلق له مواقف عشان تعرفه على وحده

بتسالون ليش ما تحبه اهي صح

لانها باختصار متزوجه

ولو يصير انها تاخذ اثنين جان ما طوفته

:)

ايام وايام مرت عليهم وكل مالها تبات محاولاتها بالفشل

لين ملت .. اخر شي اعترفلها انه يحب

الحمار خاش عن الدنيا انه يحب

انا اقول كل هالمواصفات وما يحب

شفيهم البنات ما عندهم نظر

قالت له صارحني .. منو اهي .. شلون صايره

حلوه .. من بنته .. شلون تعرفتو على بعض .. شكثر صارلك تحبها

..

بعد كل اجاباته على اسئلتها اكتشفت انه هذي العلاقه وقف نبضها

خافو على حبهم من الموت .. لانه ارتباطهم فبعض شي صعب

في اشياء اجتماعيه راح تمنعهم

تمنو الخير لبعض وبعدو

احترمو العهد اللي بينهم

مهما صار محَد منهم يحاول انه يوصل للثاني

عشان لا يتعبون

..

شلون ممكن الانسان يتحمل كل هالاشياء ويخبيها بقلبه

المهم انها صديقته ما استسلمت

قدرت بطريقتها انها تطلع رقم البنت

وتكلمها

وتسمع منها قصتهم .. وشلون هذي البنت قاعد يتقدمون لها وايد ناس وترفضهم

مو قادره تتخيل حياتها من غير حبيبها

تحبه .. وحاولت وايد انها توصل له بس خافت انها ما تحترم وعدها له

بس كان قلبها يتقطع عليه

تحبه .. تموت فيه .. تعشق التراب اللي يمشي عليه

..

عورني قلبي

..

بعد شهر تقريبا صارت علاقة البنتين وايد قويه

اتفقو انهم يتواعدون على يوم ويطلعون

وصار اللي يبونه

طلبت صديقة الولد من حبيبته .. ممكن اتصل عليه اخليه ايي

بخاطري افرح قلبه

رفضت البنت .. خافت انها تموت جدامه من الوله

اقنعتها .. علشان خاطري

اتصلت عليه .. وقالت له وينك

قال طالع .. ليش

قالت له انا قاعده مع رفيجتي بالكافيه تعال

قال لها مادري احاول

طلبته ضروري اتيي

قال انشالله .. تامرين

دزتله مسج بنفس الوقت مسج اكتبت فيه

عفيه لا تطول .. البنت اللي معاي بتمشي

وابيك تشوفها

يمكن تعجبك

غاوي

هلا ومرحبا بالاحباب .. البعاد والقراب

انشالله تغمر السعاده قلوبكم وين ما كنتو

..

موسم سفر

الكويتيين قلوبهم صلبه اسمالله عليهم

احب يراعتهم

العمر نعيشه مره وحده

بلا انفلونزا خنازير بلا انفلونزا بعارين

:)

..

هذا الصيف كان عامر بالاحداث والمواقف الحلوه

قررت اسافر بآخر لحظه

كنت متردد بالبدايه

اروح .. مارووح

والدة رفيجي تكلفت فجأه واستوجب عليه نقلها لي لندن

اااااه يا لندن

تشفي العليل

كلمني وقال .. مناف تكفه ابيك وياي

قلت : يا ولد لا تقول تكفه

تكفه تهز الرياجييل

:)

والله واتجهت لمكتب احد الاصدقاء

وحجزت كويت - دبي دار الحي - لندن العظمى

المهم ان الاخوان بالسفاره البريطانيه يزاهم الله خير

استحدثوا خدمه يديده لل في اي بي

امثالي

استغرق استخراج الفيزا يومين بالتمام والكمال

وصار اليوم الموعوود

ودعت اسرتي الصغيره

وقبلتهم

ورحت المطار

..

عاش مطارنا

لا تنظيم ولا فخامه ولا بريستيج ولا عماة عين

واقفين بالكيوو

ناس بظهر ناس

واللي يطقك بجنطته .. واللي تحوش مرته بالغلط ويخزك

اصلا مرته قاعده تضحك لي

بس عادي طوف مو وقته

:)

..

ركبت الطياره الاماراتيه

والا يمي واحد ديّن

قرر انه مالي حق احط ايدي على التكايات

فقصني الله يفقصه دنيا واخره

:)

طبعا البلاك بيري لي اخر لحظه شغال

اكتب اخر الاحداث وادزها برودكاست مسجز

وصلنا دبي

اساسا انا منسق اني ابات في دبي ليله

وثاني يوم اطير لندن

نزلنا مطارهم

والا شنو مطار ماشالله عليهم

فخم وشرح ومرتب ومنظم

واللي بالكاونترات لابسين لبسهم الوطني

الكندوره والغتره والعقال او اللفه الحمدانيه

المراد عدينا هالمرحله

وين حجزك يا بوالنيف

فندق الجميرا بيتش

مكان حلو وراقي ويليق بمقامي

:)

طبعا الحين بتقولون لي ليش مو الاتلانتس

هبة الكويتيين كلهم هناك

بصراحه الفندق وايد واااو

بس يبيله لو اليهال معاي

وانا مسافر بروحي

شنو

مسافر بروحك مناف

اي والله

:))

..

طبعا شقول وشحجي عن الفندق وفخامته

وعن الاستقبال والخدمات اللي فيه

والا فيو الغرفه اللي يطل على برج العرب

وتحتي حمامات السباحه ومرسى اليخوت

ترى بس مليت

كل هذا اللي قاعد اقوله عن يوم واحد

انا ابي اتكلم لكم عن لندن

راح اختصر الاحداث

ثاني يوم ركبت طيارتي متجه الى لندن

وانا بمطار دبي

لحظه خل اقول لكم هالسالفه اللي تفشل

ماكو غرف للتدخين بمطار دبي اليديد

وباقي ساعه على الطياره

قمت وسألت وين اقدر ادخن

قالولي بالترمينال القديم

يم البوابه رقم 150 اعتقد

طبعا مشي كيلو الله يهداهم

وصلنا غرفة التدخين والا فيها اجانب وهنود ومضيفات

وانا وواحد اماراتي

طالعته وابتسمت

قالي انت من الكويت

قلت له ايه سماهم على وجوههم

:))

سألني

وين ساير بويه

قلتله لندن

وحضرتك

قال انا ساير تايلند

قلتله درب السلامه

قال الله يعينك

جيف بتدوخ احيينه .. وراك سبع ساعات

قلت له لا انا عادتا ما انام بالطياره

ضحك وطوف السالفه

انا تالي فهمت انه تدوخ عندهم يعني تدخن

:))

..

وصلت لندن

خلصت الاجراءات بالمطار

وطلعت بره عشان الم الجو

والا براد من اللي يحبه قلبكم وقلبي

السياره ناطرتني

بيينا على الفندق

ثيستل ماربل آرتش

باختصار كانت الرحله من امتع الرحلات اللي عشت فيها كل لحظه بسعاده

حطيت اغراضي وركض صليت ما بالذمه

وطلعت .. تاكسي تاكسي

ودني حق رفيجي اياد بلندن كلينك

بروح اتطمن على والدته

وشفت اياد

مادري ردت له روحه اول ما شافني

وعانقته عناق الاحبه

وتطمنت على والدته

وتالي .. بدت الحياه

يا حلو الذكريات

التشعبط بالباصات والتمشي بالشوارع

تحت المطر .. وشاورما الدياي

ريجينت بارك

رحلاتنا لي الملحق العسكري

اوكسفورد والسوق

الهدوم

القهاوي

الضحك

الهنوود هناك مالهم حل

ماشالله بناتهم جد جميلات

كل يوم موقف

وطايحين له تصوير

وناسه ما بعدها وناسه

الاسابيع الثلاث مرت مثل البرق

للحين عانه علي قلبي

ودي ارجع

بس حسافه ما اقدر والسبه الدوام

رجعت الكويت

وقلبي للحين متعلق هناك

..

كل اللي كان ينقصني برحلتي هذي

انتي

كنت اشوفج بكل مكان اروحله

..

الظاهر اني غاوي حب

ومافي شي احبه بحياتي كثر وجودج فيها

اهداء

كلكم تتشابهون

كان عندي امل قبل ان الناس كلها تعيش عشان عندها قلب

طول ماهو ينبض .. طول ما حياتهم تكون مستمره

واللي عنده مشكله بقلبه ما يعيش

يعني عشان العين تشوف

لازم يكون القلب ينبض

عشان نتحرك ناحية الناس اللي نحبهم

لازم يكون القلب ينبض

عشان نبتسم وعشان ندمع وعشان نشكر وعشان ننقم وعشان نكبر وعشان تكون عندنا ذكريات

لازم يظل ينبض هذا القلب

..

وعشان نحب

لازم ينبض هذا القلب

لما حبيت كان عمري صغير

وكان قلبي صغير

ركضت مع نبضات قلبي لما لقيت انسانه تلوح لي بيدها .. في الناحيه الثانيه من طريج الحياه

حسيت انها تقول لي .. تعال

الطريج اهني

خلك معاي

عادي امسك ايدك

غمض عيونك

احبك

..

فتحت عيني

والا اهي مو موجوده بهالطريج

كانت هناك

بس كاني قاعد اشوفها

جدامها واحد مغمض عينه

قاعده ترتل له مشاعرها

..

كبرت بعدها

وكبر قلبي معاي

حلفت اني ما اغمض عيني مره ثانيه

مشيت بشارع كانت كل الناس معاي تمشي فيه

كانو كل اللي حولي مغمضين عيونهم

ويرتلون نفس الجمل

تعال

تعالي

الطريج اهني

خلك معاي

خلج معاي

عادي امسك ايدك

عادي امسك ايدج

غمض عيونك

غمضي عيونج

احبك

احبج

..

بس انا معاها ما كنا نبي نغمض عيوننا

سألتها .. انتي ليش مو مثلهم

قالت لي هذول جذابين

قلت لها ادري

قالت لي الحمدلله اني لقيت انسان فاهمني

قلت لها الحمدلله اني لقيت انسانه فاهمتني

احنا غير عنهم

اي احنا غير عنهم

انا كنت مثلهم وفتحت عيني ما لقيتها

اهيا بعد لما فتحت عينها ما لقته

ما تتصورين شكثر فرحان اني لقيتج

وانا بعد .. ما تتخيل شكثر كنت محتاجه لواحد يفهمني مثلك

مستعده نكمل مع بعض هالطريج

اكيد

وين نروح

كيفك

عطيني ايدج

هاك

غمضنا عيوننا

سويننا مثلهم

..

النهايات في الحياه دايما تتشابه

..

اهداء

الدوبلير

بالبدايه احب اقدم لكم حب ماله اخر

وشوق يكحّل الناظر

من شخص حيل يغليكم

سمى نفسه الخاطر

:)

..


بعد السلامات .. والتحيات .. واللمات .. والبوسات

خلوني ابدي بالموضوع اللي طال انتظاره

..

الدوبلير


هذا المصطلح يستخدم غالبا في صناعة الافلام



الدوبلير : هو الشخص اللذي ينوب عن الممثل او البطل في القيام بالمشاهد الخطره


حيث يقوم مخرج العمل باستبدال الممثل بشخص متمرس يمكنه اداء المهام الخطره نيابتا عن بطل الفلم


كل ما على الدوبلير هو انهاء المشاهد وأخذ نفس راكور الممثل

الراكور : هو الزي اللذي يرتديه البطل بالاضافه الى اللوك

حتى لا يلاحظ المشاهد الاختلاف بينهما

..

الا ان هناك بعض الابطال يقومون بأداء هذه المشاهد بأنفسهم

لدي مثالين الأول منهم الممثل العالمي : جاكي شان

والآخر هو : أحمد السقا مع فارق التشبيه

:)

..

لا اخفيكم

فكل منا له حياه اشبه بالافلام

لها بدايه ووسط ونهايه

تتخلل هذه الحياه مواقف كاللتي نراها

بعضها مفرح والبعض الاخر محزن

بعضها نستطيع تحمله والبعض الاخر نحتاج فيه الى دوبلير

..

اصحاب النفوذ احيانا يلجأون الى دوبلير يقوم عنهم ببعض الاعمال التي لا يريدون ان تكون مستمسك عليهم

الغلابا اللذين يشعرون بنقص في شخصياتهم يلجأون احيانا على ايهام الناس بأنهم ذوو اصول ماسيه لمجرد ارتداءهم زي دفعو ثمنه كل ما يملكو من نقود وكرامه

الامهات ايضا قامو بالاستعانه بدوبليره تقوم عنهن بواجبات الامومه


..

ابهات الزمن الجديد


يسوءني ويدمي قلبي .. قراءة خبر يتعلق بقتل والد أولاده

تبا لذلك القلب

وتبا لذلك الأب

..

هناك من يتمنى ان ينعم الله عليه بمولود

والاخرون يمثلون بجثث ابناءهم

..

هنيئا لأولياء الامور الصابرون .. والشاكرون لنعم الله

فمنهم من وهبه الله بطفل معاق .. ومنهم من اعطاه الله طفل مختل عقليا .. واخرون توحديون .. واخرون مصابون بامراض لا يشفيها الا الله سبحانه

ومع هذا شكروا ربهم وحمدوه على هذه النعمه .. واحسنو معاملة ابنائهم بل ومنهم من شقى وتألم وظل صابرا

لهؤلاء اقول

انتم على راسي من فوق

..

في نفسي اشياء كثيره اود مشاركتم بها

لعل في البوستات القادمه ستجدون ما يرضيكم

عذرا على هذا الموضوع اللذي لم اشأ ان اكدركم به

ولكن شيئا كان بخاطري


:)

..

في البوست القادم سأتكلم عن الحب

لطالما جبلت نفسي على ان اكون ينبوعا له .. ليرتوي منه الجميع

..

ادري ان هالوقت موسم سفر

ولأني توني ياي من بلد الضباب

ولي ذكريات ما تنسّي هناك

حبيت اهديكم اغنية السفره اللي كانت معلقه معاي


:)


..


اهداء

قلوب لا زالت تمارس الصدق

يا احلى من في هالدنيا

يالغاليين على قلبي

شلونكم

:)

..

كل مره لما ايي ابي اكتب لكم بوست

اتوهق شبتدي فيه

افكر شلون ارحب فيكم

شنو الموضوع اللي بتكلم عنه

كم واحد بيقراه

اللي فبالي قاعدين يقرولي والا لأ

:)

..

شطانه

..

سؤال وجيه: ظل احد للحين ما عنده بلاك بيري

شهالصرعه العجيبه

وشهالانتشار الصاعق والساحق يا علكم الماحق

كل ما دخلت مكان لقيت الناس كاتبه

my B.B code 3.9.1976

لحد يسجل هالرقم

ترى هذي مواليدي

..

يعني كان موضوع لافت انتباهي مثل ما اشياء كثيره تشغل انتباهنا

وتستحق التفكير والتأمل

في كل رحله من رحلاتي

اهتم اني اكون موجود بالمطار قبل موعد الاقلاع ب 3 ساعات عالاقل

احب اتمشى بالمطار

سوى في مطار الكويت وانا رايح او حتى بعودتي من مطارات الدول اللي ازورها

مو بس انا .. اغلبنا يحب اجواء المطار

المهم لين يعلنون عن قرب اقلاع الطياره

وضرورة توجهنا للبوابه

بعد ما يبيله

اخر شي اسويه

احط ايدي بمخباتي عشان اطلع باكيت الزقاير واشرب لي وحده تصبرني لين اوصل

..

وانا داخل الطياره

وبالتحديد لما اكون بالجو

احب اطالع من الشباك

قطع الارض المجزأه

ملاحظينها

تلاقون الاراضي تحتنا تكون محدده كأنها مزارع او مادري شنو

بس دايما تلفت انتباهي

..

وايد اشياء تغيرت عن الاول

وايد اشياء حلوه كانت موجوده قبل .. ما عدنا نشوفها الحين

العوايل تقسمت

الناس ما عادت تحترم بعضها بعض

صار الكل يتصيد غلطات الثاني

ما عادت الناس تتعامل بصفاء النيه

ولا بحب .. المحاكم امتلت بقضايا الاخوان ضد بعضهم بعض

المخافر امتلت بمشاكل الجيران مع بعض

الخوف من الله صارت بس كلمه تنقال من غير فعل

لا الدينيين صارو دينيين ولا المثاليين عادو مثاليين

الكل يصارخ بوقت واحد

ضوضاء بكل مكان

اغاني بكل مكان .. اناشيد تجاريه بكل مكان

اذاعات بكل مكان .. قنوات تلفزونيه بكل مكان

اوبريتات بكل مكان .. صور الناس بكل مكان

عبدة الشيطان بكل مكان .. ناس بلا تربيه بكل مكان

صبيان مزعجين بكل مكان .. بنات هايتات بكل مكان

قمت اتشائم لما ابطل الجريده واشوف صور الملتحين

اللي لا بويهم لا دين ولا بركه

قمت اتضايق لما اسمع ريال يصرخ مثل الحمار والعن

اتضايق لما تطلع وحده وتنسف دور كل المجتمع وتطلع بس اهي اللي تفهم

ودي اتقدم باقتراح حق المجلس القادم

اتمنى انه يكون التصويت

عباره عن موزه وينكتب عليها اسم المرشح

كل ناخب يكتب اسم المرشح اللي يتمنى انه يمثله على الموزه

وطريقة الفرز تكون

على كل مرشح اكل الموز اللي عليه اسمه بالكامل

واللي يخلص كل الموز اللي عليه اسمه

اهو الشاذي

عفوا اقصد اهو المرشح اللي يستحق انه يمثل المجتمع ويناقز للدفاع عن قضاياهم

..

لن ارغمكم على هذا

ولكن املي ان تختارو جيدا

تكفون

الدينيين مكانهم المسجد

مو قاعة عبدالله السالم

..

د. اسيل العوضي .. معاج لي نهاية المطاف

وانتي الوحيده المستثناه من معادلة الموز

:)

اتمنى لج النجاح يا رب

..

ختام كلامي

اقول لو خليت خربت

صحيح الطاغي سيء

لكن هذا ما يمنع من ان الناس الزينه لازالت موجوده

والناس اللي تستحق الاحترام والتقدير لازالت موجوده

فهناك دائما من يجيد الحب

وهناك ايضا قلوب لازالت تمارس الصدق

ــــــــــــــــــــــــــــــــــــــــــــ

اهداء

الكباريّه

من الاحلام اللي تراود اغلب البنات

اهو انها تحصل على فارس احلامها

منهم تتخيله بأوصاف معينه

طويل - عريض - اسمر - جميل - غني - مثقف .. الخ

ومنهم تاركه المسأله على البركه

اللي ايي من الله حياه الله

الا انه التفكير ان غاب عن البنت .. ما يغيب عن الام

او العمّات او الخالات

عدد الأثرياء بالعالم ما يتعدون الخمسين

وماشالله الكل حاط عينه عليهم

..

في عوايل الجشع عامي عينهم

يحسبون اذا زوجو بنتهم حق واحد غني خلاص

بتتوفق

راح تشتري كل شي بخاطرها

من جناط وهدوم وعيالها بيدشون مدارس خاصه

وبتركب بورش وبتسافر كل سنه دوله

و و و و

في مثل فلسطيني دايما استخدمه بهالمواقف

يقول : العز على النوَر .. بهذله

..

الحين يعني انا اذا قلت هالكلام بصلح الكون

طبعا لأ

بس اهي كلمه ممكن تفيد شخص او يمكن تأثر بمشاعر ناس قاعده تتعذب لنفس السبب

..

انا ما اقول ان الكبّاريّه سيئين

والّا يخونون حريمهم

لكنهم عرضه لضعاف النفوس اللي ما يفكرون الا بالماده والفلوس

..

في بنت حبت لها واحد ولد عز

البنت كانت حالتهم الماديه عاديه جدا

كان اكبر همها انها تتزوجه

وعشان توصل لي هالمرحله

لازم تمر بمراحل ثانيه كثيره

ضحت بوايد اشياء

كانت تطيع كل شي يطلبه منها

تكشت بمحاضراتها عشان تطلع معاه

تقص على اهلها وتحط نفسها بمواقف محرجه

بس عشان ترضي غروره

ادخلت بسكه مو سكتها

عاشرته معاشرة الازواج

وعاشرها معاشرة الانذال

داس عليها بأحقر وارخص احذيته

اللي يرخص نفسه .. ترخصه الناس

اهي كانت تفكر شلون ترضيه وتحقق حلمها بأنها تكون زوجته

واهو يفكر شلون يقضي عزوبيته بطريقته الخاصه

لين تتخرج بنت رفيجة امه اللي من مواخيذهم

عشان يتقدم لها ويتزوجها

!!

..

انتهت القصه السخيفه

انشالله القى من يتعض منها

..................................................

كلام خاص

لانسانه عزيزه على قلبي

بيني وبينها ايام حلوه .. ومواقف ماني ناسيها

انسانه تجمعني فيها صداقه واخوه ومعزّه

ولهت على ايامنا الحلوه

ولهت اسمع سوالفج

ولهت على عزايم الاكل

ما كنت اتصور انه في شي ممكن يخلينا نبعد كل هالمده

ساعات اقول احسدونا والله

انا ادري اني ماني ملاك

ومعرض للغلط

ونفس الشي انتي

!!

انا مو ياي اعاتب

ييت اقول

اني بجد فاقدج

وهم بخاطري اقول كلمه

ومن قلبي

انشالله تلقى لقلبج مكان

هذي الاغنيه احبها

وحبيت اهديكم اياها

اهداء