ليلة حب

في اخر ساعه من نهاية السنه

"ابتدى برنامج "ليلة حب

ومثل عادته

بموسيقاته الجميله الهاديه والاغاني العاطفيه الحلوه

وصوت مذيع البرنامج .. الدافي

يقول

مساء الخير

مسا الاشجار لي غرد عليها طير

..

تعالو نعيش اخر لحظه بالسنه هذي

بحب وشوق ووله

خلونا نهدي بعض اغاني

ونتمنى لبعض بداية سنه كلها سعاده وافراح

..

وبعد ما خلص كلامه .. انزلت اغنيه حلوه لعبدالمجيد عبدالله

كلها مشاعر يرتعش لها الجسم

..

بعدها تكلم مذيعنا عن معني الحب

شدني لما قال

ان الحب مجرد كلمه بحرفين للناس اللي تجهله

لكنها كلمه بألف معنى للناس اللي تعرف تحب ولها قلب

قلب ما ملاه الا شخص عرف اصول اللعب

وغلب كل انظمة الحمايه اللي من واجبها انها ما تسمح بدخوله لهالمكان

ياااااااه

تعرفون شسبب وجود حرف الحاء و الباء في مكان واحد

الحاء = حياه

والباء = بقاء

..

تعالو ناخذ هالمكالمه

المذيع: الو

المتصل: الو مسا الخير

المذيع: مساء النور تفضل .. انت عالهوا

المتصل : حبيت اقول لك انه برنامجك وايد حلو

يقاطعه المذيع: الله يخليك تسلم من ذوقك

المتصل: واحنا مع الاهل قاعدين الحين بالمخيم ومشغلين الراديو وقاعدين نسمعك

وبرد ووناسه وطايحيله كستنه وحليب امهيّل على كيف كيفك ومو ناقصنا الا وجودك

المذيع: عليكم بالعافيه ياخوي انشالله تتهنون بهالجمعه الحلوه - ابتسامه - خلاص عيل من اخلص البرنامج اييكم

المتصل: حياك والله اذا تبي احنا نيي ناخذك من مكانك افا عليك

المذيع: تسلم لي يا رب .. من تحب تهدي

المتصل: والله احب اهدي كل الاهل اهني عندنا بالمخيم واهدي الوالده حبيبتي وام ناصر زوجتي الغاليه

واهداء خاص لك انت .. ونبي اغنية على ذوقك

المذيع:حاضر من عيوني ما طلبت شي وشكرا على اتصالك ياخوي

المتصل: العفو ..مع السلامه

المذيع: مع السلامه

..

بعدها حط لنا اغنيه لشيرين

آل صعبان عليه

وبيتطمن عليّه

اولولو لسه عايشه

وكل شيء حلو بعينيه

..

ومع نهاية موسيقة الاغنيه

وعلى انغام موسيقى هاديه

:طلع المذيع بصوته يقول

ومن ليلي

اصيح الويل

يا ويلي

عذاب الليل غيّرني

تجاهلني وبكّاني

وعاندني وخلاني

اصيح الويل

وانام الليل

لأن فجري يغالطني

ولأن حبي يعاندني

اصيح ارجوك تهواني

انا مابيك تنساني

وتخليني

اعد نجوم موهومه

واقابل ناس مهمومه

تجاريني واجاريها

تسليني واسليها

تضيق مني واراضيها

ولا عرف عن اراضيها

سوى بركه

تزيد الهم بهموم

وانا المسكين محروم

احب اني اشوفك يوم

تحاول تقترب مني

وفي حبي تغافلني

عشان انسى

وعلي تقسى

واناديك

لا تخليني حبيبي

..

المذيع: معاي اتصال يديد الوو

المتصله: الو كل عام وانت بخير

المذيع: وانتي بخير

المتصله: وانشالله تكون هالسنه يارب سنه حلوه عليك وعلى كل المستمعين

المذيع: وعليج يا رب ومن تحبين

المتصله: تسلم بس حبيت اضيف شغله على موضوعك اليوم

المذيع: تفضلي

المتصله: انا دايما اشبه الحب بالرداء او العباة او البشت اختار اللي يعجبك

المذيع: انزين

المتصله: احنا نختار ناس عشان نلبسهم هالرداء وعادتا يكونون فرحانين فيه

لكن عقب فتره يبدون يتنكرونه ويقطونه على الارض لين يتوصخ

اهني احنا نتأثر لانه عزيز علينا

نقوم ننفض عنه الغبار

ونخشه لين ما نلقى احد ثاني يقدر يحافظ عليه

وبس شكرا مع السلامه

المذيع: الو .. الو .. ليش سكرتي الخط

!!

خلونا نسمع اغنيه ونرجع

..

كانت اغنيه لطلال سلامه

اسمها يا قو قلبك

الأغنيه

..

ليلة حب

واخر لحظه في هالسنه

حبيت فيها اني اكون معاكم

نحتفل بميلاد سنه جديده

خلونا ناخذ تليفوناتنا

ونشوف من عليه ولهنا

ونبعث لهم رسايل تفرح قلوبهم

وتملي ليلتهم بهجه اهم محتاجينها

والا خلونا نرسل لهم ايميل نكتب فيه

كل عام وانتو بخير

صدقوني

لا تلغون اجمل صفاتكم

دام انكم طيبين

بيدنا نخلي الحياه حلوه

وبيدنا نخليها مؤلمه

الله يبعد عنا وعنكم الالم

..

باخذ اتصال

المذيع: الو

المتصله: الوو

المذيع: تفضلي انتي عالهوا شتحبين تقولين بنهاية هالسنه

المتصله: كنت حابه اقول شالفايده انه نقرب من ناس ما يبونه نكون معاهم

المذيع: شلون؟؟

المتصله: يعني انا مثلا كنت احب انسان كان اهو الدنيا بالنسبه لي لكن من مده زعلنا

وللأسف شكثر كنت احاول اني اقرب منه وهو ما يبي حتى يعطيني هالفرصه اللي ابين له فيها اني للحين شاريته وابيه ومو مستعده اني استغنى عنه .. يعني مادري شقول لك بس مو هاينه علي نفسي بعد يعني مابي اذل روحي .. يعني ياليت الناس تتعلم من الكلام اللي قاعد تقوله ترى والله مافي شي يسوى انه نضايق نفسنه عشانه.. ويعطيك العافيه على هالبرنامج الحلو

المذيع: تسلمين عزيزتي بس نصيحه عمرج لا تحطين فبالج انج ذليتي نفسج او اهنتيها بالعكس اللي سويتيه يدل على انج انسانه تملكين قلب كبير وتحبين الناس اكثر من روحج .. النبي عليه الصلاة والسلام في يوم من الايام فقد اذى جاره الكافر وراح يسأل عنه تخيلي وهو احب البشر لله .. العبره من هالتصرف انه جاره دخل الاسلام عدل والا لأ

اللي ابي اوصلج اياه اهو مهما تضايقتي من شخص ومهما وصلت درجة الاذى منه تأكدي انه راح ايي الوقت اللي يحس فيه بتقصيره واكيد راح تهدى فيها النفوس وترجع الامور لطبيعتها صدقيني شرط بيحس بغلطته وبيفقدج ويرجع .. مافي عداوه دايمه

انشالله ما تبدي هالسنه الا وانتو راجعين لبعض مثل اول واحسن بعد عموما شكرا لاتصالج

..

حبايبي الوقت خذانا

بدون ما نحس فيه

بقت دقايق على السنه اليديده

خلوني اتمنى لكم سنه كلها حب وقرب

واذا عندكم شي ودكم تقولونه او امنيات تتمنونها لنفسكم ولي

لا تبخلون علي فيها

:)

كل عام وانتو بخير

_______________

لوير

طالت الغيبه

والله مكانج فاضي

:(